Aningaasanut inatsit: Avannaata Qimussersua annertunerusumik aningaasaliiffigineqartalerpoq

Avannataa Qimussersua ukioq nutaamiit amerlanerusunik aningaasaliiffigineqartalissaaq. Qimussersuaqartarneranimi ukiut pingasukkaarlugit annertunerusumik aaqqissuussisoqartassaaq.

Aningaasaaliissutit, qimussersuaqartoqarnissaanut qamutinik qimminillu assartuinermut aninagasartuutinik matussusiisussat, ukioq nutaamiit amerlanerulissapput.

Avannaata Qimussersuaqartoqarnissaanut ukioq manna 250.000 koruuninik aningaasaliisoqarpoq. Aappaaguli Avannaata Qimussersuaqartoqarnissaanut aaqqissuisut kattuffillu annertunerusumik tapiiffigineqarsinnaalerput.

Aningaasammi illikartinneqartut aappaagu 1,5 milliuunit koruuniussapput.

- Iluaqutaassaqaat, taama oqartoqartariaqarpoq, KNQK-mi Kalaallit Nunaanni Qimussertartut Kattuffianni, siulittaasoq Johan Olsen Sermitsiaq.AG-mut oqarpoq.

2021-mi amerlanerusut peqataassapput

Aningaasat peqataasut aningaasartuutaannut taarsiissutissatut illikartinneqarput. Soorlu qamutit qimmillu timmisartukkut angallannerinut aningaasartuutinut taarsiinernut atorneqassallutik, kultureqarnermut naalakkersuisoqarfik ilisimatitsivoq.

KNQK-p aappaagu Qimussersuaqartoqarnissaa piareersalereerpaa. Qimussersuaq Ilulissani martsip naanerani ingerlanneqassaaq. Kommunillu akimorlugit katersuussinnaanermut killilersuineq januarimi 2021-mi atorunnaartussaariarpat, aaqqissuussineq iluatsilluarsinnaalereerpoq:

- Aaqqissuussinermi Inughuit Qimussersua, Upernaviup Qimussersua, Avannaata Qimussersua aamma Tunup Qimussersua ataatsimoortumik Ilulissani ingerlanneqassapput. Tamanna isumaqarpoq aaqqissuussaq nalinginnaasumit annertunerujussuussasoq. Taamaammat aningaasaliissutit annertunerulernerat nuannaarutigaarput, Johan Olsen oqarpoq.

Taanna nassuiaavoq Qimussersuaqartitsisarneq ukiut pingasukkaarlugit annertunerusalissasoq.

Suli aningaasaliisussarsiussapput

Aningaasaliinerulli annertunerulernera isumaqanngilaq qimussertartut aaqqissuisullu eqqissisimaarsinnaalersut.

- Aaqqissuussineq kingulleq 2019-imi ingerlanneqartoq 1,5 milliuunit koruunit missiliorlugu akeqarsimavoq. Tamanna isumaqarpoq aaqqissuussineq maanna annertunerussammat, suli aningaasaliisussarsiortariaqartugut qinnuteqartaarlutalu. Aningaasaliissutit annertunerulernerat malunnaataassooq, isumaqanngilarli eqqissilluta aaqqissuussamut utaqqiinnalissasugut, KNQK-mi siulittaasoq oqarpoq.

Naalakkersuisoqatigiinni partiit isumaqatigiissutiminni aalajangerpaat Avannaata Qimussersuanut ukiut sisamat tulliuttut katillugit 3,5 milliuunit koruuninik aningaasaliisoqassasoq.

Ukiut tullii aningaasaliissutit imaalerput:

  • 1.500.000 koruunit 2021-mi
  • 750.000 koruunit 2022-mi
  • 750.000 koruunit 2023-mi
  • 1.500.000 koruunit 2024-mi
Powered by Labrador CMS