Skip to main content

Aningaasanut inatsit: Ataatsimiititaliaq Naalakkersuisullu isumaqatigiinngittut

Aappaagu aningaasanut inatsisissami amigartoorutaasussat tallimanngorpat aningaasanut inatsisissap aappassaaneerlugu suliarineqannginnerani annikilliallalaarsimapput, Aningaasaqarnermulli Akileraartarnermullu Ataatsimiititaliap amigartooruteqartoqannginnissaanik piumasaa naammassiuminaatsinneqarpoq.

Aappaagu aningaasanut inatsisissaq nunami politikkerinit isumaqatiginninniutigineqaleruttorpoq.

Inatsisartut Aningaasaqarnermut Akileraartarnermullu Ataatsimiititaliaa isumaqatiginninniarnermi qitiusutut inissisimavoq, ataatsimiititaliallu inatsisissatut siunnersuutip Inatsisartuni tallimanngorpat aappassaaneerlugu suliarineqannginnerani isumaliutissiissutini tunniuteqammerpaa.

Ataatsimiititaliami siulittaasuuvoq Siumumeersoq Hermann Berthelsen, partiillu Inuit Ataqatigiit, Demokraatit, Partii Naleraq aamma Nunatta Qitornai ilaasortaatitaqarlutik.

Isumaliutissiissummi takuneqarsinnaavoq, ataatsimiititaliamit ukioq manna allakkajaatut isumaqatiginninniarneq naammagineqanngilluinnartoq, tassani coronap nunarsuarmi tuniluunnera aallaqqaammulli sunniuteqarsimavoq – tassa suliap kinguaattoorneranik aningaasaqarnemullu malunnaatilimmik sunniuteqarsimalluni.

Ataatsimiititaliaq: Amigartooruteqarniarneq akuersaarneqarsinnaanngilaq

Naalakkersuisut aningaasanut inatsisissatut siunnersuut saqqummiuteqqaarmassut 183.2 millioner koruuninik amigartooruteqartussatut isikkoqarpoq, ataatsimiititaliamillu tamanna akuersaarneqarsinnaasimanngilaq.

Ataatsimiititaliap taamaammat arlaleriarluni Naalakkersuisunut piumasarisimavaa sipaarutissanik nassaarniartoqassasoq, tassa aningaasanut inatsit amigartooruteqartussaanngitsutut imaluunniit sinneqartuulaartussatut inissinniarlugu.

Ataatsimiititaliarmi isumaqarpoq, coeonap tuniluunnera sivisusinnaasoq, taamaammallu ataatsimiititaliap 2021-miili amigartooruteqartoqannginnissaa piumasarisimavaa.  

Naalakkersuisut sipaarutaasinnaasunik nassaarsimanngillat. Naalakkersuisulli ataatsimiititaliamut ilisimatitsissutigisimavaat, aningaasanut inatsisissatut siunnersuummi malunnaatilimmik sipaarutissaqartoqareersoq.

Aamma Aningaasaqarnermut Akileraartarnermullu Ataatsimiititaliap nammineerluni oqaatigisinnaasimanngilaa, aningaasat suminngaanniit pissarsiarineqassanersut. (Naalakkersuisut allannguutissatut siunnersuutaasa aappassaaneerlugu suliarineqarnissaa ilanngutassiap naggataani takuneqarsinnaavoq.)

Amigartoorutissat miliuuninik marlussunnik annikillisinneqarsimasut

Amigartoorutissatut siunnersuutigineqartut inatsisissap aappassaaneerlugu suliarineqannginnerani 180.7 millioner koruuninngortinneqarlutik miliuuninik marlussunnik annikillisinneqarsimapput. Aningaasanut inatsiseqarfiusumi 2021-2024-mi 165,0 millioner koruuninik amigartooruteqartoqassaaqr.

- Naalakkersuisut iliuusaat missingersuutit immikkut annertoorujussuarmik amigartoorfiunissaannut tunngatillugu ajornartorsiutit annertuut aaqqiivigineqarnissaannut suleqatiginnikkusunngissuseqarnertut ataatsimiititaliamit isigineqarput. Tamanna ataatsimiititaliamit assut isornartoqartinneqarpo, ataatsimiititaliaq isumaliutissiissummini isornartorsiuivoq.

Naalakkersuisut ataatsimiititaliamut ilisimatitsissutigisimavaat, pingajussaaneerinninnissamut allannguutissatut siunnersuutissat pilersaarutaasut piffissami missingersuuteqarfiusumi katillugit 25,5 millioner koruuninik missingersuutinik pitsanngoriartitsissasut.

Sipaarutissat 140 millioner koruunit amigaataasut

2021-miit 2024-mut aningaasanut inatsisissaq amigartooruteqassanngippat, sipaarutissat140 millioner koruuniusut suli nassaarineqanngillat:

- Ukiut sisamat ingerlaneranni 139,9 millioner koruuninik amigartooruteqarnissamik missingersuuteqarneq peerneqarsinnaaqqullugu ukiumut agguaqatigiissillugu 35 millioner koruunit sipaarutissatut pissarsiarineqarnissaat inerniliunneqartariaqarpoq, ataatsimiititaliaq isumaliutissiissutimini allappoq.

Ataatsimiititaliap tassunga atatillugu Naalakkersuisunut eqqarsaatigeqquaa, aningaasanut inatsisissaq novembarip 27-ani inaarutaasumik aalajangiiffigineqartussaammat sipaarutissanik nassaarniarnissamut piffissaqarpallaartoqanngitsoq.

Tallimanngorpat aningaasanut inatsisissaq aappassaaneerlugu suliarineqalerpat, Inatsisartut ataatsimiittarfianni aningaasanut inatsisissap isumaqatiginninniutigineqarnera ingerlateqqinneqassaaq.

Naalakkersuisut aappassaaneerinninnissamut aningaasartuuteqarneruffiginiagaat:

- Tamatuma kingunerisaanik kalerrisaarinermi ataatsimut sianerfissaq l-1-2-mut ukiumut aningaasartuutit AIS2021-mi naatsorsuutigisatut 1.000.000 koruuniunatik 1.580.000 koruuniusussaasutut nalilerneqarrnata kontu pingaarnermut, 20.l1.70 Suliniutinut nutaanut sillimmatit, aningaasaliissutit ukiumut 580.000 koruuninik ilaniarneqarput..

- NemKontop ingerlannissaata aningaasalersornissaanut Digitalinngorsaanerrnut Aqutsisoqarfimmut aningaasaliissutit 350.000 koruuninik ilaniarneqarput.

- Kingullertut kontu pingaarneq, 50.06.25 Aalisarneq pillugu Ataatsimiititaliarsuaq, matumani ataatsimiititaliarsuup coronavirusip takkunnera pissutigalugu sulinerata kinguaattoorsimanera tunuliaqutaralugu 1,0 millioner koruuninik aningaasaliissuteqarfigalugu AI2021-mut ilanngunniarneqarpoq, taamaattumik Aalisarneq pillugu Ataatsimiititaliarsuup isumaliutissiissutini 2021-p affaata siulliani Naalakkersuisunut tunniutissallugu naatsorsuutigaa. AIS2021-mi siunertamut aningaasanik immikkoortitsisoqarsimanngilaq.

Naalakkersuisut aappassaaneerinninnissamut aningaasartuutikinneruffiginiagaat:

Nunatsinni efterskolit ingerlanneqarnerinut tapiissutit, aningaasaliissutit 1 %-imik ikilinerannik kinguneqartussamik ukiumut 252.000 koruuninik ilanngarneqarnissaat matumani pineqarpoq. Ukiuni tulliuttuni efterskolimi atuartut ikilinissaannik naatsorsuuteqarneq tunngavigalugu ilanngaaniartoqarpoq.

Aatsitassanut Isumalioqatigiissitamut aningaasaliissutit 2021-mi 1,5 millioner koruuninik ilaniarneqarput, matuma kingorna kontu pingaarneq AI2021-mi peerneqassalluni.

Tamkkua saniatigut Suleriaatsimut Ataatsimiititaliap siunnersuutigaa, Inatsisartut Ombudsmandiannut aningaasaliissutit ukiumut 260.000 koruuninik ilaneqartassasut.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER