Skip to main content

Aningaasanut inatsit: Naalakkersuisut isertitsissutissanik nutaanik nassaarput

Aningaasanut inatsisissatut siunnersuut Inatsisartut ullumikkut aappassaaniissavaat

Naalakkersuisut 2016-imut aningaasanut inatsisissanut naatsorsuutit qimerloorluarsimavaat ullumikkullu allannguutissanik arlalinnik saqqummiussissapput, nunap karsianut imassaaleqisumut isaatitsisussanik.

Vittus Qujaukitsup aningaasanut inatsisissap Inatsisartuni ullumikkut pingasunngornermi aappassaaneerneqarneranut atatillugu akissuteqaataani tamanna takuneqarsinnaavoq.

40 millionit koruunit
Isertitassatut aningaasaliissutinut allannguutissatut siunnersuutit aqqanillit  2016-mit 2019-mut 40 millionit koruuninik isertitsissutaasussanut tunngapput.

Siunnersuutigineqartut ilaa ilisimaneqareerpoq, minnerunngitsumik qaleralinnut akitsuusersuinissat nutaat aalisanermik sulialinnik tigulluarneqanngitsut.

Atuaruk: Halibut Greenland akitsuutinut nutaanut aarlerisaarivoq

Atuaruk: Aalisarnermut Siunnersuisooqatigiit: Akitsuut nutaaq tukappoq

Raajat amerlanerusut
Isertitassat ilaatigut 2016-mi raajanut pisassiissutit 66.500-mit 83.000 tonsinut biologit siunnersuutigisaattut naatsorsuutigisatut qaffanneqarnerinik peqquteqarput.

Aammattaaq Greenland Contractorsip Pituffik qaammatini arfinilinni kiffartuussigallartussaanera immikkut isertitaqartitsivoq.

Atuaruk: Greenland Contractorsip Pituffimmut nutaamik isumaqatigiissuteqarpoq

Kisiannili killormoortuanik Naalakkersuisut avaleraasartuunik akitsuusersuinikkut isertitsissutaasussat 2016-mi 81 millionit koruunininngaanniit 40 millionit koruuninut appartippaat, aalisarnerup ingerlalluannginnera pissutigalugu.

Atuaruk: Tunumi avaleraasartuut ukioq manna ikinnerupput

Nukissiorfiit
Naalakkersuiusulli aningaasartuutissanik nutaanik aamma saqqummiussaqarput.

Politikerimmi aamma Qorlortorsuarmi imermit nukissiorfiup 2016-mi aamma 2017-mi allilerneqarnissaa kissaatigaat. Allilerinikkut erngup nukinga atorlugu innaallagissiorfiup innaallagiak pilersittagaa marloriaatinngortinneqassaaq.

Atornerluisunik katsorsaasarnissamut pilersaarummi siunissami nunarput tamakkerlugu katsorsaasarnissanut aningaasanik immikkoortitsisoqarnissaa ilanngullugu qinnutigineqarpoq. 

Atornerluisunut katsorsaanermut pilersaarut Namminersorlutik Oqartussani susassaqarfiit akimorlugit, kommuninullu tunngatillugu suliniutinik ataqatigiissunik imaqarpoq.

Aappiunerusoq
Aningaasanut aamma Akileraartarnermut ataatsimiititaliaq Naalakkersuisut allannguutissatut siunnersuutaannut annerusumik anngaallutik ileqimisaartorput. Kisianni ataatsimiititaliap ataasiakkaat naaggaarpaat.

Naalakkersuisut takornariaqarnermut siunnersuisooqatigiinnut Visit Greenlandimut tapiissutit ikilineqarnissaat kissaatigigaluarpaat, tamannali ataatsimiititaliap itigartitsissutigaa.

Naalakkersuisut nunani tamalaani ikiuiniaqatigiiffinnut aningaasanik tapiissuteqarniarlutik ajunaarnersuaqartillugu kissaatiginnippata, ataatsimiititaliap aalajangiinerit akuerereertarniarlugit piumasaraat.

Aningaasanut inatsimmi 500.000 koruuninik sinaakkutaqarpoq, Naalakkersuiusullu nammineerlutik aalajangeeriarlutik ataatsimiititaliamut paasissutissiisarnissartik kissatigaat.

Qimaasut saqitsaassutaasut
Taannarpiarlu ikiunissamut konto aningaasanut inatsimmiittoq aasaanerani annertuumik oqallisigineqarpoq, Namminersorlutik Oqartussat Europami qimaasoqangaatsiarneranut atatillugu tapiissuteqarnissaat Inuit Ataqatigiit siunnersuutigimmassuk. Partiili siunnersuummut amerlanerussuteqarsinnaasimanngilaq.

Atuaruk: IA Røde Korsimut 500.000 koruuninik tapiissuteqarnissamik siunnersuuteqartoq

2016-mut aningaasanut inatsisissamut siunnersuummut novemberip 20-ani taasisoqassaaq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER