Aningaasanut inatsit akuersissutigineqarpoq

Siumut, Nunatta Qitornai aamma Demokraatit 2020-mut aningaasanut inatsit akuersissutigaat.

Inatsisartuni sivisuumik oqallisigineqareersoq inatsit akuersissutigineqarpoq

Akitsuusersuinissat, illuatungiliuttunit isornartorsiorneqangaatsiaqisut, oqallinnermi eqqartorneqangaatsiarput.

Biilit pisiassallu ilaat akitsuuserneranni ukiuni sisamani tulliuttuni 200 million koruunit sinnerlugit iluanaarutaassapput, biilit innaallagiatortut akitsuuteqalersinneqassapput, aamma ilaatigut sukkut, mamakujuttut, imigassat aalakoornartullit tupallu eqqunneqarneranni akitsuuteqalissallutik.

Naalakkersuisoqatigiit Siumut aamma Nunatta Qitornai kiiisalu naalakkersuisoqatigiinnut tapersiisut Demokraatit aningaasanut inatsit aappaagumoortoq isumaqatigiissutigalugu ataasinngormat atsiorput. Aningaasanut inatsit ukiuni sisamani tullerni 1,7 milliuunit koruuninik sinneqartoorfiussaaq.

Aningaasanut inatsimmut Inatsisartuni 13-it akuersipput qulit akuerinagu taasillutik.