Aningaasanut inatsit 2020-moortoq ataqatigiissinniarlugu akitsuusersuisoqassaaq

Inatsisartut ullumi ataatsimiinnerat aallartinnialertoq oqaluuserisassat, inatsisinut allannguutitut siunnersuutaasut, piffissaq kingulleq atorlugu oqaluuserisassanut ilanngunneqarput. Biilit innaallagiatortut akitsuuteqalissapput, sukkut, puussiat plastikkiusut aamma cigarettit allallu, eqqunneqarnerani aamma akitsuuteqalissapput.

Akitsuutit tassaassapput aningaasanut inatsimmut aappaagumoortumut iluaqutaasussat.

Biilit pisiassallu ilaat akitsuuserneranni 48,1 milliuunit koruunit iluanaarutaassapput, siunnersuutit aningaasanut naalakkersuisumit ullumi saqqummiunneqarpoq. Tamanna isumaqarpoq ukiuni sisamani tullerni akitsuutinik 200 milliuunit koruunit missaannik iluanaaruteqarfiussapput.

Naalakkersuisoqatigiit Siumut aamma Nunatta Qitornai kiiisalu naalakkersuisoqatigiinnut tapersiisut Demokraatit aningaasanut inatsit aappaagumoortoq isumaqatigiissutigalugu ullumi atsiorput. Aningaasanut inatsit ukiuni sisamani tullerni 1,7 milliuunit koruuninik sinneqartoorfiussaaq.

Aningaasanut naalakkersuisoq, Vittus Qujaukitsoq (NQ), piffissaq kingulleq atorlugu inatsisinut allannguutinik siunnersuuteqarpoq. Biilit innaallagiatortut akitsuuteqalersinneqassapput. Aammali ilaatigut sukkut, mamakujuttut, imigassat aalakoornartullit tupallu eqqunneqarneranni akitsuuteqalissallutik.

Snescooterilli ATV-llu eqqunneqarneranni akitsuutaat peerneqassapput kiisalu ATV-it akitsuutaat apparneqassallutik. Akitsuutinik appaaneq 2021-mi atulersinneqassaaq.

- Siunnersuutit tamarmik aningaasaqarnermut inatsisip 2020-mi isumaqatigiissutigineranik tunngaveqarput , Vittus Qujaukitsoq siunnersuutinik saqqummiinermini oqarpoq.

Tamuasassarujussuaq

Partii Naleraq biilit innaallagiatortut akitsuusernissaannut ukiaq manna siunnersuuteqaraluarpoq, Inatsisartunili amerlanerussuteqartunit taperserneqanngimmat siunnersuut siullermeerlugu suliarineqareernerani tunuartinneqarpoq.

Demokraatit maanna nassueruteqarput aningaasanut inatsit 2020-moortoq ataqatigiissinniarlugu taamatut akuerseqataasariaqarsimallutik. Partii tunngavimmigut akitsuutinut akuersaartuunngilaq, maannali biilit innaallagiatortut akitsuusernissaannut, ilaatigullu sukkut, mamakujuttut, puussiat plastikkiusut, imigassat aalakoornartullit aamma tupat eqqunneqarneranni akitsuusertarnissaannut akuerseqataassalluni.

- Akitsuutit uagutsinnut nuannersuunngillat, aamma akitsuutit nuanninngisaannarput. Akitsuutilli uku akuerisimavagut aningaasanut inatsit ataqatigiissoq angorusukkatsigu, Nivi Olsen (D) oqarpoq.

Akitsuutit

Allannguutissatut siunnersuut ullumi novemberip 18-ani siullermeerneqarlutillu, aappassaaneerneqarlutillu pingajussaaneerneqassapput.

Allannguutissatut siunnersuut malillugu biilit innaallagiatortut ukiumut 6.554 koruuninut aaqqinneqassaaq, tassa biilit minnerit assigalugit akitsuuserneqassalluni. Akitsuusiineq januaarip aallaqqaataani 2021-imi atulissaaq, akitsuusiiffillu siulleq tassaassalluni 21. april 2021-miit 30. september 2021 tungaanut.

Pisiassat arlallit eqqunneqarnerani akitsuuserneqartussatut aamma siunnersuutigineqarpoq. Sukkut suulluunniit, taakkunani sirup aamma glukose ilanngullugu kiilumut 10 koruunit 31 øremik eqqunneqarnerani akitsuuserneqartassaaq. Aamma tunguarnitsut mamakujuttullu, imigassallu aalakoornartullit aalakoornartutaata annertussusaa aallaavigalugu nunatsinnut eqqunneqarnerani akitsuusersorneqassapput. Cigarettit tupallu allat taamatuttaaq akitsuusersorneqassapput, soorlu aamma puussiat plastikkiusut akitsuuserneqartalissasut.

Ataatsimiinneq aallartiinnartut illuatungiliuttunit piumasarineqaraluarpoq ataatsimiinneq unillatsiartariaqartoq, allannguutissatut siunnersuutit piffissaq kingulleq atorlugu oqaluuserisassanut ilanngunneqarnerat pissutigalugu.

- Inuiaqatigiit aningaasaataat pineqarput. Inuiaqatigiit kaasarfiinit aallertoqaqqinnialerpoq. Ataatsimiinnerup unillatsiarnissaanik piumasaqarpugut, suliap oqaluuserineqannginnerani, IA-miit Aqqaluaq B. Egede oqarpoq.

Atassut, Partii Naleraq aamma Suleqatigiissitsisut ataatsimiinnerup unillatsiarnissaanik aamma piumasaqarput. Inatsisartut Siulittaasuata Vivian Motzfeldtip oqaatigaa siunnersuutit siullermeerneqareerpata ataatsimiinneq unillatsiarumaartoq.

- Aningaasat akitsuutinit aaneqartut ilaqutariit meeqqallu atugaannut pitsanngorsaatitut atorneqassapput. Aamma ilinniartitaanerup qaffassarneqarnissaanut aningaasanik pisariaqartitsivugut. Taama suliaqarneq nuannersuunngilaq, taamali suliaqarneq pisariaqarpoq, Vittus Qujaukitsoq oqarpoq.

Powered by Labrador CMS