Aningaasanut inatsisissatut siunnersuut: Naligiinnerujartorneq - maannakkuunngikkallartorli
Aningaasanut inatsisissatut siunnersuummut qulequtsiussaq isumalluarnaraluartoq, inuiaqatigiinni naligiinnerulersitsisusamik suliaqarnissaq suli amigaataavoq. Asii Chemnitz Narupip innuttaasut pakatsisimanerat paasisinnaanerarpaa.
Aningaasaqarnermut Naalakkersuisup naalakkersuisooqatigiit aappaagumut aningaasanut inatsisissatut siunnersuutaat sisamanngormat saqqummiuppaa. Oqaatigineqareersutut siunnersuummi annertuunik allannguinissaq ilanngunneqarsimanngilaq. Aaqqissuusseqqinnissat 2023-unissaanut piareersarlugit ingerlanneqartut oqaatigineqarpoq.
Aningaasaqarnermullu Naalakkersuisup Asii Chemnitz Narupip sisamanngormat tusagassiortunik katersortitsinermi oqaatigaa, inuiaqatigiinni naligiinngittoqarneranik annikillisaanissaq maanna pisinnaanngitsoq.
- Oqaatigisariaqarparput inuiaqatigiinni naligiinnginneq annertoorujussuusoq. Gini-koefficentimi Nunarput ajortumik inissisimavoq. USA-misulli naligiinngittoqarnerujussua qanilliartorparput, Skandinaviamilu nunanut allanut sanillersuukkutta, erseqqissumik takuneqarsinnaavoq taakku naligiinnginnerup akiorniarneqarneranik ukkataqarnerusut, Asii Chemnitz Narup oqarpoq.
Nunanut avannarlernut kinguussaaqqavugut
2017-imut Aningaasaqarnikkut Ingerlatsineq pillugu Nalunaarummi allassimavoq, Nunanut OECD-mut ilaasortaasunut sanilliullugu Kalaallit Nunaanni agguataarinerup naligiinnginneranik uuttortaat malillugu agguaqatigiissitsinermi Gini-koefficienti annertunerulaartoq. Naatsorsueqqissaartarfip 2015-imi isertitanut atatillugu nalunaarusiamini Nunani Avannarlerni EU-milu Gini-koefficientit sanillersuussimavai, tassanilu takuneqarsinnaavoq Nunanut Avannarlernut sanilliugllu Kalaallit Nunaanni naligiinnginnerusoqartoq aamma EU-mut sanilliullugu naligiinnginnerusoqalaartoq.
Taamaakkaluartoq inuiaqatigiinni pissakinnerpaat Naalakkersuisut nunami naligiinngittoqarneranik annikillisaaniarlutik qineqqusaarnermi neriorsuisimanerat eqqarsaatigalugu naammagittarlutillu tatiginnittariaqarput.
Aningaasanut inatsisissaq qinersisoqarnera pissutigalugu piffissami sivikitsuaqqami suliarineqarsimavoq. Taamaammat aaqqissuusseqqinnissat annertuut imaluunniit inuiaqatigiinni isumalluutit agguataarneqartareri allanngortinniarlugit suliniutissat annertuut maannakkorpiaq pisinnaanngillat, Asii Chemnitz Narup saqummiussinermi nassuiaavoq.
Akileraartarnermik aaqqissuusseqqinnissaq aalisarnermullu inatsisissaq suliarineqartut
Gini-koefficient
Gini-koefficienti inuiaqatigiinni aningaasaqarnikkut naligiinngittoqarneranut uuttortaatitut atorneqarnerpaasarpoq.
Gini-koefficienti 0-ip 1-ittullu akornanni inissisimasarpoq, Gini-koefficient 1-imiikkaagat naligiinnginnerujussuaqarneranut takussutissaasarpoq, tassani inuiaqatigiinni isertitat tamarmik inummut ataatsimut tuttarlutik, Gini-koefficientili 0-imiikkaagat kikkut tamarmik assigiimmik isertitaqartarlutik.
2017-imut Aningaasaqarnikkut Ingerlatsineq pillugu Nalunaarut naapertorlugu, Gini-koefficient siunertamut atorneqarnissaa mianersuuttariaqarpoq. Gini-koefficientip alliartorneranut takussutissaavoq, innuttaasut piitsuunerulersimanngikkaluartut ilaasa pisuujunerulersimanerannut.
Pissarsiffik: Naalakkersuisut
Aningaasaqarnermut Naalakkersuisup maannakkorpiaq allannguisoqannginnerata akueriuminaassinnaanera paaasisinnaanerarpaa.
- Pakatsisimassagussi paasilluarsinnaavara. Ajoraluartumik massakkorpiaq neriorsuisinnaanngilanga. 2022-mut aningaasanut inatsisissaq ukioq manna inatsimmut assingussaaq. Qineqqusaanermili neriorsuutit naammassiniarlugit annertuumik suliaqarpugut, taanna oqarpoq.
Naalakkersuisut naalakkersuisooqatigiinnissamik isumaqatigiissuteqartoqarmalli oqaatigereernikuuaat, nunami naligiinngittumik atugaqartoqarnera annikillisarniarlugu akileraartarnermik aaqqissuusseqqittoqarniartoq. Siunniussat naammassiniarlugit Naalakkersuisut 2023-mut aningaasanut inatsisissaq ukioq manna suliaralugu aallartereerniarpaat.
Naalakkersuisut nutaamik Aalisarnermut inatsisiliortoqartinnagut Aalisarneq pillugu Ataatsimiititaliarsuup innersuussutissai maannakorpiaq utaqqimaarpaat. Innersuussutit pisassiissutinik piginnittuunermik allannguisinnaapput, taamalu nunami isumalluutit uumassusillit agguataarneqartarnerannut allannguisinnaallutik, taakku inuussutissarsiuteqartut isertitarisartagaannut aamma sunniuteqarsinnaapput.