Aningaasanut inatsisissaq pillugu oqallinnissaq Naalakkersuisut kinguartikkusuppaat
Aningaasanut inatsisissamut 2021-mut siunnersuutip akuersissutiginissaanut killigititap sivitsorneqarnerat pillugu Inatsisartut inatsisissaannik Naalakkersuisut siunnersuuteqarput. Inatsissaq sisamanngornermi tuaviortumik suliarineqassaaq.
Aningaasanut inatsisissap 2021-moortup akuersissutigineqarnissaanut killigititap sivitsuallannissaanut, Aningaasaqarnermut Naalakkersuisup Vittus Qujaukitsup Inatsisartunut siunnersuutaa, sisamanngornermi 12. november tuaviortumik suliarineqassaaq. Siunnersuut ullormi tassani tulleriisiinnarlugit siullermeerneqarlunilu, aappassaaneerneqarlunilu pingajussaaneerneqassaaq.
Aningaasaqarnermut ataatsimiititaliap saaffiginninnera malillugu, Naalakkersuisut inatsisissatut siunnersuummik, immikkoortoq 101-mik, siunnersuuteqarput. Siunnersuut aningaasanut inatsisissap 2021-moortup akuersissutigineqarnissaanut killigititap 27. novemberimut kinguartinnissaanik imaqarpoq.
Inatsit malillugu aningaasanut inatsisissaq aappaagumoortoq kingusinnerpaamik 15. november akuersissutigineqartassaaq.
- Inatsisartut aningaasanut inatsisissatut siunnersuummik piffissaqarluarnerulluni suliaqarnissaa qulakkeerniarlugu, Inatsisartut Aningaasaqarnermut Akileraartarnermullu Ataatsimiititaliaat 2021-mut Aningaasanut Inatsisip akuersissutigineqarnissaanut killiliussap kinguartinneqarnissaa pillugu siunnersuummik saqqummiussinissaq pillugu saaffiginnippoq, inatsisissap siullermeerneqarnerani saqqummiussissummi nassuiarneqarpoq.
Nunatta aappaagu aningaasaqarnera pillugu Inatsisartut ulluni aqqaneq-marlunni suli suliaqarnerusinnaanermik taamaasillutik periarfissinneqassapput.
Kommuninut sunniuteqassanngilaq
Aningaasanut inatsisissap akuersissutigineqarnissaata kinguartinneqarnissaanik Inatsisartut suliaqartarnerat takornartaanngilaq. Vittus Qujaukitsoq assigusumik kingullermik siunnersuuteqarpoq aningaasanut inatsisissaq 2020-moortoq 2019-mi suliarineqarmat, tassani akuersinissap 21. novemberimut kinguartinneqarnissaa aalajangerneqarpoq.
Kommunilli aningaasanik aqutsinerat ukioq manna nikisinneqassanngitsoq ilisimatitsissutigineqarpoq. Kommunimmi akileraartarnermut procentiliinerat, ulluunerani paaqqinnittarfinnut akigititassanut inissiinerat aamma aappaagumut aningaasaqarnermut missingersuusiornerisa nikisinnissaannut peqqutissaqartoqanngilaq.
- Tassunga atatillugu killiliussat ulloq 1. decembarimut kiisalu novembarip naaneranut inissinneqareersimanerat, taamaalillunilu ukiumi kingusinnerusumeereernerat tunngavissaatinneqarpoq.
Aningaasaqarnermut Naalakkersuisoq Vittus Qujaukitsoq siunnersuutip siullermeerneqarnerani saqqummiussinissamini ilisimatitsissutigaa nunatta aningaasaqarneranut aappaagumoortumut inatsisissap akuersissutigineqarnissaanut killiliussap nikisinnissaanut inatsisissatut siunnersuut, 1. januar 2021-p tungaanut atuutissasoq. Tassa imaappoq aningaasanut inatsisissap akuersissutigineqarnissaanut killiliussaq ataavartumik allanngortinneqassanngilaq.
Inatsisartut nittartagaanni atuarneqarsinnaalereerpoq aningaasanut inatsisissaq 2021-moortoq 27. november pingajussaaneerneqassasoq.