Aningaasanut inatsisissaq piffissaliussap iluani naammassineqarsinnaanngitsoq

Inatsisartut 2020-mut aningaasanut inatsisissap akuersissutigineqarnissaanut piffissaliussaq allanngortinniarlugu immikkut ittumik inatsisissamik aqangu suliarinnipallassapput

Aningaasanut inatsisissap inaarutaasumik suliarineqarnissaa sapaaip akunneranik ataatsimik kinguartinneqarpoq. Sisamanngorpat inaarutaasumik suliarineqartussaagaluarpoq.

Taamatulli kinguartitsineq imaaliinnaq pisinnaanngilaq, tassa aningaasanut inatsisissaq novembarip 15-ani auerineqareersimassasoq inatsisitigut piumasaqaataammat. Inatsisartut taamaammat aqangu inatsisissatut siunnersuut suliaripallanniarpaat, imatut paasillugu, aappaagu aningaasanut inatsisissaq kingusinnerpaamik novembarip 21-ani akuerineqartussanngorpoq.

- Inatsisartut aningaasanut inatsisissatut siunnersuummik piffissaqarluarnerulluni suliaqarnissaa qulakkeerniarlugu, 2020-mut Aningaasanut Inatsisip akuersissutigineqarnissaanut killiliussap kinguartinneqarnissaa siunnersuutigineqarpoq, inatsisissatut siunnersuummut taamatut tunngavilersuisoqarpoq.

Aningaasanut inatsisissatut siunnersuutip ukiakkut ataatsimiinnermi inaarutaasumik suliarineqarnissaa novembarip 21-anut kinguartinneqareersimavoq, tassa inatsisissatut siunnersuutip aqangu akuerineqarnissaa naatsorsuutigineqarsimarpassilluni.

Aningaasanut inatsisissap suliarineqarnissaanik kinguartitsisoqarpoq, erseqqissimmat naapeqatigiissitsiniarnermi annertuumik ajornartorsiuteqartoqartoq. Sermitsiaq.AG-mit tallimanngormat oqaluttuarineqarpoq, isumaqatigiinngissutaasut annertungaarmata naalakkersuisooqatigiit isasooriaannaasut.

Isumaqatigiinngissutaasut annersaasa ilagaat, pensionisiassanik pitsanngorsaanissamut aningaasalersuinissat. Tassani eqqumeeqqutigivaa, Aningaasaqarnermut Ataatsimiititaliami Demokraatinit ilaasortaatitat kisimik Naalakkersuisunut tapersersuinerat, akerlianik Siumut sinnerlugit ilaasortaasut illuatungiliuttut itigartitsinerannut tapersiillutik.

Naalakkersuisut siunnersuutigisimavaat akitsuutinik qaffaasoqassasasoq, Siumut illuatungiliuttullu piumasarisimavaat allatut aningaasaliissutaasinnaasunik ujaasisoqassasoq. Suliassaq tamanna Naalakkersuisut sapaatip akunnera kingulleq suli aallartissimanngilaat.

Taamaalilluni pensionisiat qaffanneqarnissaannik siunnersuutip suliarineqarnissaa kinguartinneqartariaqarsimavoq. Tamatuma kinguneranik aningaasanut inatsisissaq piffissaliussaq eqqorlugu akuersissutigineqarsinnaanngilaq.

Powered by Labrador CMS