Aningaasanut inatsisissaq amigartooruteqarfiusoq saqqummiunneqarpoq
Aningaasanut inatsisissatut siunnersuut aappaagumut amigartooruteqarfiusoq Naalakkersuisunit maanna saqqummiunneqarpoq. COVID-19-ip kinguneranut tunngatillugu pisortat kiffartuussinerata ajornerulersinneqannginnissaa pillugu, sipaarniartoqarujussuannginnissarlu pillugu amigartooruteqarnissaq siunniunneqarpoq.
Aningaasaqarnermut Naalakkersuisoq Vittus Qujaukitsoq (NQ) aappaagumut aningaasanut inatsisissatut siunnersuut amigartooruteqarfiusoq, pisortat kiffartuussinerata iluani sipaarniarnermik kinguneqartitsisussaanngitsoq, maannakkorpiaq saqqummiuppaa:
Siunnersuut qulequtserneqarsimavoq ”Inuk qitiutillugu”.
Nunarsuup sinnerani nunanut allanut sanilliullugu Kalaallit Nunaat coronavirusip ajornartoortitsineranit annikinnerusumik eqqorneqarpoq. Taamaattoq coronavirusip ajornartoortitsinera aningaasanut inatsisissatut siunnersuummi 2021-moortumi initungaatsiarpoq, ajornartoortitsineq amigartooruteqartitsissammat. Amigartooruteqarujussuarnissaq 2021-mi pinngitsoortinneqarsinnaanngilaq.
- Siunnersuut 2021-mi 183,3 milliuunit koruuninik amigartoorfiussaaq
- 2021-2024-mi katillugit 174,9 milliuunit koruunit amigartoorutigineqassapput
- Piffissami 2022-2024 8,5 milliuunit koruuninik sinneqartooruteqarfiussaaq.