2015-imut aningaasanut inatsit
Aningaasanut inatsisissaq 2015-moortoq amigartoorfiussaaq
Kalaallit Nunaata karsianut aningaasat naatsorsuutigineqartumit annikinnerusut naalakkersuisut aningaasanut inatsisissamut 2015-moortumut saqqummiussinerminni nalunaarput
Kalaallit Nunaat 83,5 millionit koruuninik amigartooruteqarnissaq Naalakkersuisunit aappaagumut aningaasanut inatsisissatut siunnersuutip saqqummiunneqarnerani naatsorsuutigineqarpoq. Aningaasaqarnermut nunamullu namminermut naalakkersuisup Vittus Qujaukitsup Siumumeersup siunnersuut saqqummiuppaa.
Nunatta karsia 100 million koruuninik imigassamut cigaretsimullu akitsuutinik annikinnerusumik isertitaqarpoq. Avaleraasartuunik pisasiinnermi aamma nalornissutigineqarpoq pisassiissutit tamakkerlugit aalisarneqassanersut.
Akitsuusiinerit
Siunnersuummut saqqummiussinermi sipaarniartoqalernissaa oqaatigineqarpoq, aatsitassarsiorfinni suliffissanik ammaasoqarnissaani aamma suliffissat ikinnerusut naatsorsuutigineqartariaqalissapput, kiisalu aalisarnermut aamma utoqqalinersiaqarnermut sipaarutit akitsuuserneqassallutik.
Taamaakkaluartorli neriunartoqarpoq. Naalakkersuisut 2016-mi 31 million koruuninik sinneqartoornissartik naatsorsuutigaat.