Aningaasanut inatsisissap suliarineqarnissaa taamaammat kinguartinneqarpoq
2021-mut aningaasanut inatsisissap akuersissutigineqarnissaanut piffissaliussap ullunik aqqaneq-marlunnik kinguartinneqarnissaa qinnutigineqarsimavoq, partiit inerniliussassatut siunnersuut isumaqatigiissutigisinnaanngimmassuk.
Siunnersuut Aningaasaqarnermut Ataatsimiititaliap 2021-mut aningaasanut inatsisissamik suliaqarnissaannut ullunik aqqaneq-marlunnik periarfissiisoq ullumi sisamanngornermi nukiginnartutut suliarineqassaaq.
Aningaasaqarnermut Naalakkersuisoq Vittus Qujaukitsoq siunnersuummik saqqummiussisuuvoq, taamaalilluni aappaagumut aningaasanut inatsisissap akuersissutigineqarnissaa inatsit malillugu novembarip 15-iani pinnani novembarip 27-ani pisussanngorlugu kinguartinneqarpoq.
Naatsumik oqaatigalugu
Naatsumik oqaatigalugu Aningaasaqarnermut Naalakkersuisup Vittus Qujaukitsup 2021-mut aningaasanut inatsisissatut siunnersuut aggustusip qaammataani saqqummiuppaa, tassani Naalakkersuisut amigartooruteqartussatut siunnersuuteqarsimapput.
2021-mi 183,3 millioner koruuninik amigartooruteqartoqassaaq.
2021-miit 2024-mut 174,9 millioner koruuninik amigartooruteqartoqassaaq.
Ukiuni missingersuusiorfiusuni 2020-2024-mi 8,5 millioner koruuninik sinneqartooruteqartoqassaaq.
Inatsisartuni ilaasortat aningaasanut inatsisissaq taamatut isikkoqartllugu akueriniarnagu nalunaaruteqarsimapput, aningaasaqarnermut ataatsimiititaliap aamma Hermann Berthelsen siuttoralugu kissaatigisimavaa pisariaqartinneqartunik sipaaruteqartoqassasoq aamma aningaasanut inatsit minnerpaamik amigartooruteqarfiussanngitsoq.
Ataatsimiititaliamit kissaatigineqartut
Aningaasaqarnermut Ataatsimiititalip qinnuiginninneratigut, Naalakkersuisut siunnersuutigaat 2021-mut aningaasanut inatsisissap akuersissutigineqarnissaat piffissaliussaq kinguartinneqassasoq, Vittus Qujaukitsoq ullumi nalunaaqutaq aqqanernut Inatsisartut oqaluttarfiannit siunnersuummik saqqummiussissaaq, siunnersuullu taanna ullumi oqaluuserisassani kimiippoq.
Aningaasaqarnermut Ataatsimiititaliap siulittaasuata Hermann Berthelsenip ilisimatitsissutigaa, ataatsimiititaliaq 2021-mut aningaasanut inatsisissamik suli suliaqarmat allanik oqaaseqarsinnaanani.
Aningaasanut inatsisissaq novembarip 20-ani aappassaaneerlugu suliarineqassaaq, novembarillu 27-ni pingajussaaneerlugu suliarineqassalluni.