Aningaasanut inatsisissaq 2024-moortoq tallimanngornermi pingajussaaneerneqarlunilu naggammik Inatsisartunit taasissutigineqartussaavoq.

Aningaasanut inatsisissaq 2024 sukannersumik aningaasatigut ingerlatseqqiineruvoq, taamaammallu 2024-mi sinneqartoorutissatut siunniunneqartut 280 millioner koruuninik annertussuseqarput.

Piffissami 2024-miit 2027 ilanngullugu ingerlatsinermut sanaartornermullu aningaasalissutit pereernerini, IS-mik pineqartartoq naapertorlugu sinneqartoorutit 1,3 milliarder koruuninik annertussuseqassapput.

Tallimanngornermi naggataarutaasumik aningaasanut inatsisissaq oqallisigineqarmat, imeruersaatinut akitsuut saqitsaassutaaqisoq annertuumik oqallisigineqarpoq.

Nunatta karsiata iluanaarutissai annertussangatinneqartut 

Saqitsaassutaasup qiterpiaa tassaavoq ukiumi nutaamiit immiaaqqat sodavandillu tuniniarneqartarneranni allannguerujussuartoqartussaammat, tassunga pissutaavoq Nuuk Imeq tunisassiornerminik unitsitsisussaammat. Suliffeqarfimmi matuneqarpat immiaaqqat sodavandillu avataaniit eqqussorneqartussanngortussaapput.

Tamanna isumaqarpoq Naalakkersuisut (nunatta karsia) pisarnermit annertunerusumik isaatitsisussanngornerannik kinguneqassasoq, tassunga pissutaavoq imeruersaatit imigassallu aalakoornartortallit nunatsinnut eqqussukkat akitsuutaat qaffasinnerummat nunatsinni maqitanut sanilliullugit.

Missiliutigineqaqqaarpoq, imeruersaatit puuisa akitsuutai aqqutigalugit iluanaarutai 2024-mi 90-120 millioner koruunit missaat nunatta karsianut isertinneqartussat amerlassuseqassasut. Taaamaakkaluartoq Naalakkersuisut siunnersuuteqarput akitsuut pineqartoq appartinneqassasoq, taamaalilluni imeruersaatit puuanut ataatsimut akitsuut 60 ørinik appartinneqassasoq. 

Akitsuutip appartinneqarnera taanna aalajangiunneqartoq aqqutigalugu, nunatta karsiata iluanaarnerulissutigisassai taamaalillutik 20 millioner koruuninik ukiumut  annikinnerulertussanngorput, akitsuutinut akigitinneqartunut ullumikkut atuuttunut sanilliullugu, tassa allannguuteqartoqannginnissaanut sanilliullugu.

Demokraatit annertuumik akerlilersuipput

Akitsuutip pineqartup apparneqartussaagaluartoq, taamaattoq Demokraatit sakkortuumik akerlilersuipput akitsuut taanna aqqutigalugu isertitsinerulissutaasussat amerlammata, Inatsisartullu ukiaq manna ataatsimiinneranni Demokraatit arlaleriarlutik Naalakkersuisunut akerlilersuipput.

Demokraatimmi isumaqarput akitsuut pineqartoq nutaajusoq, tassunga tunngavigineqarluni iluanaarutit annertoorujussuarmik qaffanneqartussanngornerat - tassa akitsuut siornatigut innuttaasunit akilerneqarneq ajortut akilerneqartalertussanngomata.

Illuatungaani Naalakkersuisut naalakkersuisooqatigiillu partiivi aalajangiusimannipput akitsuut pineqartoq nutaajunngitsoq, aammalu akitsuut pineqartoq maanna allaat apparneqartoq.

Naalakkersuisut tikkuaapput, aningaasat amerlanerusut nunatta karsianut ikineqartartussanngoraluarpataluunniit, imeruersaatit eqqussukkat Nuuk Imermit pisiassaniit akikinnerussasut ilimagissallugu pissutissaqarluartoq.

Jensen: tupinnartuliaanngilaq

Oqallinnermi aningaasaqarnermut Naalakkersuisoq Erik Jensen (S) eqikkaalluni imatut oqaaseqarpoq:

- (...) Inatsisartut ukiaq manna ataatsimiinneranni eqqussuinermut akitsuutinik nutaanik saqqummiussinngillat aamma akitsuutit qaffanneqarnissaannik siunnersuuteqanngillat. Paarlattuanilli akitsuutit appartinneqarnissaat pillugu siunnersuuterput akuersissutigineqarpoq, aap, tusaasarsi eqqorpoq imeruersaatit puuisa akitsuutaasa appartinneqarnissaannik siunnersuuteqarpugut neqinut eqqussukkanut akitsuutit atorunnaarsivinneqarnissaannut tapiliullugu, Erik Jensen oqarpoq.

Taamatuttaaq Erik Jensen tusagassiuutitigut nalunaaruteqarluni Demokraatit siulittaasuat Jens-Frederik Nielsen qisuariarfigaa, taassuma sapaatip akunnerata matuma ingerlanerani siusinnerusukkut pissusissamisuunnginneraalluni demokratiimillu ataqqinninnginneeraalluni Naalakkersuisut uparuarmagit imeruersaatit puuisa akitsuutaat pillugu neqit akitsuutaasa piivinneqarnissaanut taputartuussinerarlugit:

- Minnerpaamilluunniit demokratiimik innarliiniarnerunngilaq aamma tupinnartuliaanngilaq. Paarlattuanilli Naalakkersuisut sukkasuumik sukumiisumillu sulinerannik ersersitsineruvoq, tassa inatsisip suliarineqarnerani isertuaatsumik torersumillu ingerlatsineruvoq, Erik Jensen tusagassiuutitigut nalunaarummini erseqqissaavoq.

Tallimanngornermi oqallinnermi politikerit taakku marluk isumaqatigiinngilluinnarlutik oqallinnerat aamma ingerlaqqippoq, akitsuut nutaajunersoq nutaajunnginnersorluunniit suli oqallisigineqarluni, tusarnaarlugillu taakku assortuuttut naaperiarfissaqanngitsutut nipeqarput.

Tallimanngornermi Inatsisartut ukiakkut ataatsimiinnerat ullut ataatsimiiffiit kingullersaraat.