Aningaasanoorfiup Kalaallit Nunaat siunnerfigaa
'spil.gl' decembarimi saqqummiunneqarpoq, siunissami GM-eqarnerani ilaatigut aningaasanoortoqarsinnaalernissaa anguniarneqarpoq.
Timersornermi Nunatsinni pissartanngorniuttoqartillugu unamminerni aningaasanoortoqartalernissaa periarfissaalersinniarlugu 'spil.gl' saqqummiunneqarpoq.
'spil.gl' decembarimi saqqummiunneqarpoq, maanna 583-nik ilaasortaqarpoq.
- Aningaasanoorfimmi aamma nunani allani timersortunik assigiinngitsunik aningaasanoortoqarsinnaavoq. Casinomik kiisalu assigiinngitsunik aningaasanoortoqarsinnaavoq nittartakkatsinni. Aningaasanoorfinnit allanit allaanerussuterput tassaavoq una Kalaallit Nunaannut tunngasuummat. Kalaallit oqaasii atorlugit aamma saqqummingajalerpoq, spil.gl-imi tuniniaanermut akisussaasoq ingerlatseqataasorlu Martin Nordlund Sermitsiaq.AG-mut oqarpoq.
Nunatsinnut tulluartoq
Ingerlatsiviup isertitaminit akileraaruteqartassaaq.
- Pilersinneqalernera pissanganartorujussuuvoq. Nunatsinnut tulluartuunissaa pingaartitaraarput, Kalaallit Nunaannilu unamminerit aningaasanoorfigineqarsinnaalissallutik. Kisianni ilaasortagut soorunami paarissavagut, arlaannik ajortoqartoq takusinnaalerutsigut pissarsiariniarsarisassavagut, aningaasanoorajuttuuneq pillugu ikiugassaanersut paasiniartassallugu, Martin Nordlund oqarpoq.
Timersornermik aaqqissuussinerit
Timersornerup tungaatigut aaqqissuussisalernissartik kissaatigaat.
- Aaqqissuussat angisuut aaqqissortalernissaat takorloorparput, tassuunartaatigut inuiaqatigiinnut utertitsisinnaassaagut. Timersoqatigiiffinnik taperseerusuppugut, aningaasatigut periarfissaannik pitsanngorsaanissaq aqqutissiuusseqataaffigerusullugu, nassuiaavoq.
Pokertartoq millionip affaanik eqquisimasoq ilisimatitsissutigaa.
- Ammaqqammerluta pokerernermik aningaasanoortoq eqquerujussuarpoq. Tamanna uagutsinnut soorunami eqquigaluartoq taamatut eqquisoqarnera nuannaarutigaarput, Martin Nordlund oqarpoq.