Skip to main content

Aningaasanik katersuiniarnermi isertinneqartut ilaat danskit suliffeqarfiannut tunniunneqassapput

Neriuffiup aningaasanik katersuiniarnera akisuvoq. KNR-imut 100.000 koruunit tunniunneqassapput. Aamma katersarineqartut 5 procentii danskit attaveqaqatigiinnermut suliffiannut tunniunneqassapput

(Allaaserisaq Juaaka Lyberthip nalunaarutaanik immikkoortortalimmik nutarterneqarpoq)

2.525.246,45 koruunit.

Kalaallit Nunaanni kræftimut akiuiniarnermut peqatigiiffia Neriuffik taama amerlatigisunik aningaasanik tasersaqarpoq. Katersuiniarneq KNR-TV-kkut toqqaannartumik aallakaatinneqarpoq arfininngormat. 

Aatsaat taama amerlatigisunik katersuiniarnermi tunisisoqarnera nuannaarutigineqaqaaq. 

Kræftimik eqqugaasunut qanigisaannullu aningaasat atorneqassapput. Aningaasalli katersarineqartut tamaasa taakkununnga atorneqassanngillat. 

Katersuiniarnermut KNR-TV-kkut toqqaannartumik aallakaatitsisoqarnera akisusoq, Neriuffiup siulittaasuata Sara J. Brandtip Sermitsiaq.AG-mut oqaatigaa. 

- Aningaasat katersorneqartut naatsorsornerat suli naammassinngilarput. Kisianni 2,5 million koruunit katersorneqartunit 100.000 koruunit KNR-TV-mut tunniunneqassapput, Sara J. Brandt oqarpoq. 

- Lynge Olsen A/S-imik isumaqatigiissuteqarfeqarpugut (danskit suliffeqarfiat ussassaarinikkut attaveqaqatigiinnikkullu suliffeqarfiat Køge-mi allaffeqarfeqartoq), taakku ataqatigiissaarillaqqissuupput. Katersarineqartut 5 procentii tunniunneqassapput taakkununnga, Neriuffiup siulittaasua Sermitsiaq.AG-mut oqarpoq. 

 2.525.246,45 koruunit 126.000 koruunit 5 procenteraat. Kisianni katersarineqartut oqaatigineqareersutut suli naatsorsorneqarput. 

Tamarmik akeqanngitsumik sulinngillat
- Naamik, suleqataasut akeqanngitsumik sulinngillat. Peqatigiiffimmi sulisut kiisalu sianertunik sullissisut akeqanngitsumik kisimi sulinngillat. Nipilersortartut angalanerat aamma akilerpagut, Sara J. Brandt oqaluttuarpoq. 

Nipilersortartut katersuiniarnermi tamarmik akeqanngitsumik sulipput. Taama aaqqissueqataasoq Juaaka Lyberth nalunaarpoq.

Nipilersortut peqataasut akissarsiaqaratik peqataapput. Tamanna uanga qularnaatsumik oqaatigisinnaavara. Nipilersornertaanut 2014-mi aallakaatitsinermi aningaasartuuteqarpianngilaq. 2015-mi nipilersortunut aningaasartuutit tassapput timmisartumut bilitsi ataaseq siumut utimullu Ilulissaniit, aamma Qaqortumiit utimullu ataaseq. Inuillu marluk ineqarfimmi 'Nordbo'-mi ineqarnerat. Katersuiniarnerni tamani aliikkusersuinerit aaqqissorneqarnera uanga isumagisarpakka, tamanna aamma akeqanngitsumik ingerlattarpara, Juaaka Lyberth nalunaarpoq. 

Katersuiniarermi nittarsaassineq akisuvoq 
Neriuffimmut uteriarutta Sara J. Brandtip katersuiniarnermi nittarsaassineq akisusoq oqaluttuarpoq.

- Ussassaarutit TV-kkullu takutinneqartut akisupput. 100.000 koruuninik ukioq manna aamma akeqassasut naatsorsuutigaarput, Neriuffiup siulittaasua oqarpoq.

Akissarsiaritinneqartut aamma ukioq manna akisunerupput. Peqataasut amerlanerit piumasaqaatigaat ukioq kingullermit marloriaammik akissarsitinneqarnissartik. Neriuffiup katersuiniarnera KNR-TV-kkut toqqaannartumik aallakaatinneqaqqaarpoq. 

KNR-TV-mut, tv-kkut takutitassianut ussassaarutinullu 100.000 koruunit ukioq kingulleq atorneqarsimasut takuneqarsinnaavoq. 135.000 koruunit akissarsianut atorneqarput, kiisalu teknikkikkut atortunik attartornermut 70.000 koruunit atorneqarlutik. 2014-milu katersuiniarnermi angalanernut 60.000 koruunit atorneqartut aamma takuneqarsinnaavoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER