Sungiusaasumik soraarsitsineq
Aningaasaliisartussanngorunartup unammisartut taamaatippai
Tekle Ghebrelulip sungiusaasutut soraarsitaanerata kingorna Nuummi suliffeqarfik Konpapi aalajangerpoq unammisartunut aningaasaliisartoorusukkunnaarlutik
Konpap Nuuk, Nunatsinni allaffissornikkut pisattanik tuniniaasartoq kalaallit isikkamik arsaallutik nunanut allanut unammisartuinut aningaasaliisartunngornissani pilersaarutigisimangaluarpaa.
Nunanulli allanut unammisartunut sungiusaasup Tekle Ghebrelulip soraarsitaanerata kingorna suliffeqarfik unammisartunut aningaasaliisartoorumajunnaarpoq.
- Unammisartunut aningaasaliisartunngornissarput pillugu Kalaallit Nunaani Arsaattartut Kattuffia oqaloqatigisimangaluarparput. Tekle Ghebrelulimulli pisut kingulliit tunngavingalugit aningaasaliisartunngorniarluta isumaqatiginninniarnigut taamaatippagut. Isumaqarpugut KNAK suliffeqarfiup pingaatitaatulli pingaartitsinngitsoq, tassami Tekle Ghebreluli bananitalersukkamik assilineqarsimavoq, kingornali taanna tunngavigalugu soraarsitaalluni.
- Tamanna pissusissamisuunngilaq, Konpap Nuummi piginneqataallunilu pisortaq, Jan Rasmussen, Sermitsiaq.AG-mut oqarpoq.
Atuaruk: Nunanut allanut unammisartunut sungiusaasoq tupaqqasoq: Soraarsitaavunga
Akuliukkusunngitsoq
Suliffeqarfik KNAK-mut isumaqatigiissuteqangajassimasoq, taanna oqaluttuarpoq.
- KNAK-mut aningaasaliisartunngorniarluta aalajangersimangaluarpgut, kisianni taamaatipparput. Massakkut timersuummik allamik aningaasaliiffigisinnaasatsinnik ujaasissaagut, Jan Rasmussen oqarpoq.
Piffissami kingullermi pisut tunngavingalugit Tekle Ghebrelulip soraarsitaasimanera, taassuma paasinngilaa.
Sungiusaasoq soraarsitaasoq tapersersoraa
- Akuliukkusunngilagut. Sungiusaasummulli soraarsitsinermi tunngavilersuutigineqartoq kukkuneruvoq, suliamilu Tekle Ghebreluli 100 procentimik tapersersorparput, taanna oqarpoq.
Konpap Nuuk unammisartunut aningaasaliisartunngornissani qilanaarisimangaluarpaa.
- Nunanut allanut unammisartunut aningaasaliissuteqarnikkut Kalaallit Nunaannu tunniussaqarniaraluarpugut. Suliat ingerlanneqartut nuannarisimangaluarpagut. Unammisartut pitsaasuupput Kalaallit Nunaanniilli aallartitaalluarlutik, unammisartut pimoorussisuupput arsallaqqeqalutillu. Kisianni Tekle soraarsitaavoq, suliarlu tusagassiuutitigut malinnaavigisimavarput, massakkulli unammisartunut aningaasaliisartuunissarput orniginartikkunnaarparput, Jan Rasmussen oqaluttuarpoq.
Atuaruk: Nunanut allanut unammisartut peqataajunnaarnissartik eqqarsaatigaat
Kattuffimmiit ajusaarfigineqartoq
Sungiusaasoq soraarsitaasimasimasoq iluamik pineqarsimanngitsoq, taanna isumaqarpoq.
- Kalaallit Nunaani Arsaattartut Kattuffia assigiinngitusunik nalunaaruteqattaarnerniik ammillu qalipaataanik immikkoortitsinermik pisumut ersarissumik isummertaqariarput. Kattuffimmi paatsiveerunneqarpoq. Sungiusaasumik soraarsitsinermut angusat pissutaallutik kattuffilluunniit allamik ersarissumik nassuiaatissaqarpat taava aningaasaliisartuusinnaanissarput eqqarsaatigeqqissinnaavarput, taanna tikkuaavoq.
Kalaallit Nunaani Arsaattartut Kattuffia Tekle Ghebrelulip pisortatigoortumik utoqqatserfigisariaqaraat, Jan Rasmussenip oqaatigaa.
- Tekle Ghebrelulip taama pineqarnerata kingorna unammisartunut aningaasaliisartuunissaq piffissaanngilaq. Kamassarilaartuusinnaavoq, tamannalu pimoorussineranik patsiseqarpoq. Taamaammat neriuutigaarput arsaattartut kattuffianiit utoqqatserfigineqarnissaa, Jan Rasmussen oqarpoq.
Atuaruk: KNAK aningaasaliisartunik annaasaqariaannaavoq