Aningaasaliisartunit taarsigassarsineq: Mobilimut isumassarsiaq taperserneqarpoq

Nunani tamalaani mobilikkut tunisassiamik iluatsittumik nutaamik takorluugaqarneq Greeland Venturemit taarsigassarsinikkut pingaarutilimmik alloriarfiuvoq.

Greenland Venturep suliffeqarfimmut Attavimmut taarsigassartititsiniarnera Poul Holmip nuannaarutigaa.

Kalaallit suliffeqarfiat it-mik suliaqartoq Attavik, Greenland Venturemit pingaarutilimmik aningaasaliiffigineqarpoq, tamanna aningaasaliisussanik allanik pissarsinissamut ajornannginnerulersitsivoq.

Mobilit atatilerlugit

Attavimmik aaqqiissuteqarnikkut mobilit attaveqaammut ataatsimut attaveqalersinnerisigut imminnut antennitut atorlutik sumiiffinni attaviluttuni imaluunniit attaveqanngitsuni mobilimut aamma internetimut attavimmik pilersitsisinnaanerat, isumassarsiap tunuliaqutigaa.

Poul aamma Jeanne Holm Nuummeersut Attavik pilersippaat, ukiullu sisamat matuma siorna isumassarsiaq USA-mi patenteqarfigilerpaat,

USA-mi tunisariniaraat

- Amerikamiut niuerfianni 2019-ini pisiniarfinniilernissarput naatsorsuutigaarput, Poul Holm Sermitsiaq.AG-mut ilisimatitsivoq.

Greenland Venturep maanna allanngortinneqarsinnaasunik taarsigassarsititsinissamut akuersinera ingerlatseqatigiiffimmut pingaaruteqartorujussuusoq, aningaasaliisunut allanut qinnuteqarniarnermut ajornannginnerulersitsimmat, taanna oqaluttuarpoq.

15 millionit koruunit pisariaqartinneqartut

- Danmarkimi aningaasaliisussanik ujaarlerpugut, kisianni aamma EU-mi, Poul Holm ilisimatitsivoq, amerikami takorluugaq iluatsissappat katillugu aningaasanik 15 millionit koruuninik ingerlatseqatigiiffik pissarsisariaqartoq taanna naliliivoq.

Greenland Venturep tapiineratigut maanna suliffeqarfimmi eqqissilluni sulinissamut qulakkeerisoqarpoq, Attavimmik pilersitsisoq ilisimatitsivoq.

Teknologimut aningaasaliineq siulleq

Attavimmit aamma Greenland Venturemit ataatsimut tusagassiuutinut nalunaarut naapertorlugu, Kalaallit Nunaanni teknologimik ingerlatseqatigiiffimmut siullermeerluni aningaasaliisoqarpoq.

Aningaasaliinermut ingerlatsisoq Per Buhl Olsen oqarpoq:

- Isumassarsiamut aamma nioqqutissamut periarfissalerujussuarmut aningaasaliivugut: Aningaasaliineq nalorninartortaqarpoq, kisianni aningaasaliinerup tamanna siunertaraa: Tassa suli annertuumik suliassamut, kisianni annertuunngornissamut periarfissaqartumut aningaasaliineq, taanna oqarpoq, nangillunilu:

Teknik siuttuusoq

- Attavik tassaavoq kalaallit teknikkiat siuttoq, nunani tamalaani annertuunik atuisunik nassaarsinnaasutut ilimagisarput.

Powered by Labrador CMS