Aningaasaatilissuit sisorariarniarlutik qulimiguulimmik attartorsimasut aatsaat taamak amerlatigisut
Kalaallit Nunaanni qaqqani sisorarniarluni qulimiguulimmut ilaaneq akisuupilussuugaluartoq, Air Greenland sisorariarniartunik ulikkaartajoorpoq
Air Greenland qulingiluanik AS350-inik qulimiguujuteqarpoq, taakku qaqqat qaavinit inunnit suli sunnerneqarsimanngitsunit sisorariarniani atorneqarsinnaapput. Ukioq manna apriilip qaammataaniit septemberip qaammataata tungaanut qulimiguullit arfinillit taakku tamarmik sisorariarnianit inniminnerneqarsimapput.
- Siornamut sanilliullugu ukioq manna sisorariarniat qulimiguulinnik nalunaaquttap akunnerini ulluniluu atorsinnaasaminnik inniminiisimasut marloriaatinngorsimapput, Air Greenlandimi tuniniaanermut pisortaq Flemming Glyager Sermitsiaq.AG-mut oqarpoq.
Inuit aningaasaatilissuit Europameersut, USA-meersut Canadameersullu Kalaallit Nunaanni sisorarniarlutik aalajangersimasut matumani pineqarput.
Niuerneq soqutiginartoq
- Qulimiguulimmik ulluni marlunni atugassaminnik inniminniikkajunnerupput, aammali takusarparput ulluni arlalinni sapaatilluunniit akunnerini atugassaminnik inniminniisartut, oplyser Flemming Glyager, tamanna timmisartuutileqatigiiffimmut soqutiginarluinnartumik niuernerusoq pillugu isertuussinngitsoq oqarpoq.
Inuit taakku tassaanerusarput, inunnit allanit tikinneqarsimanngitsuni sisorarusuttartut.
- Immikkuullarissunik takorusuttarput, soorunami qulimiguulimmik aquttulimmik attartoraangamik qanorluunniit akeqaraluaraangat akiliisarmata sullitarissallugit uagutsinnut pilerinarluinnartuupput, tuniniaanermi pisortaq, sisorartitsisarfiit sisorariarnissamik tuniniaasartut eqqarsaatigalugit eqaatsumik sullissiniartarnertik,peqataasullu tamarmik sisorariartarnissaannik isumaginninniartarnertik ilanngullugit oqarpoq.
Eqqissillutik sulinngiffeqartartut
Sisorariartartut aningaasaatilissuit tusaamasanik arlalinnik ilaqartarput, Air Greenlandimiillu taakku kinaassusaat sapinngisamik isertuunniarneqartarpoq, kikkunnit tamanit malinnaaffigineqaratik eqqissillutik sisorarsinnaatinniarlugit.
Flemming Glyagerip ilisimatitsissutigaa, pingaartumik Kitaani sisorarusuttoqartartoq. Pingaartumik illoqarfiit Ilulissat, Maniitsup Kangaamiullu eqqaanni. Ataasiakkaat Tunumi sisorariarnissamut aamma inniminniisarput. Akerlianik Nuup eqqaani qaqqanukarusuttunik Air Greenland saaffigineqarneq ajorpoq.