Skip to main content

Aningaasaateqarfimmi siulersuisut akiligassinneqassasut

Fonden Destination East Greenlandip siulersuisuini ilaasortat 2018-imut 2019-imullu naatsorsuutinik tunniussisimannginnerat kinguneqartinneqartussanngorpoq.

Kommuneqarfik Sermersuumi aningaasaqarnermut ataatsimiititap ataatsimiinnissaanut kommunimi pisortap Lars Møller-Sørensenip politikkerinut inassutigaa, kommunip aningaasaateqarfimmut aningaasaliissutai 574.000 koruuniusut, aningaasaateqarfiup naatsorsuutiminik tunniussinissaata tungaanut uninngatinneqarallassasut.

Politikkerit inassuteqaammut akuersissappata, naatsorsuutit aaqqiiffigineqarnissaasa tungaanut kommuni aningaasaliissuteqaqqinngikkallassaaq.

Aamma atuaruk: Takornariartitsisartutut aningaasaateqarfimmut aningaasaliissuteqartarneq matuneqartoq

Siulersuisut naatsorsuutinik piffissaagallartillugu tunniussisimannginnertik pissutigalugu akiligassinneqarnissartik naatsorsuutigisariaqarpaat.

6.000 koruunit angullugit akiligassinneqarnissaq

Siulersuisuni ilaasortat ukiunut naatsorsuuteqarfiusunut marluusunut akisussaaffeqarsimasut, naatsorsuutit tunniunneqarpata piffissaliussamik malinnissimannginnerminnut 3.000 koruuninik akileqqusissummik tigusaqassapput. Naatsorsuutit ataatsit 3.000 koruuninik akiligassiissutigineqassapput, taamaalilluni akigassat katillutik 6.000 koruuniussallutik.

Ukiumoortumik naatsorsuusiornissamut inatsit malillugu, naatsorsuutit tunniunneqarnissaat qaammammik ataatsimik kinguaattoorfiusimappata 500 koruuninik akiligassiisoqartussaavoq. Qaammatit marluk kinguaattoorfiusimappata akiligassaq 2.000 koruuninut qaffanneqassaaq. Piffissaliussarlu qaammatinik pingasunik amerlanerusunilluunnii  malinneqarsimanngippat 3.000 koruuninik akiligassiisoqassalluni.

Pisortaq akiligassinneqassanngitsoq

Destination East Greenlandimi, inuussutissarsiummik ingerlatsisutut aningaasaateqarfiusumi siulersuisuni ilaasortat kisimik akiligassinneqartussaapput. Tassa pisortaq akiligassinneqassanngilaq, akiliutigisaq naggataatigut Danmarkip naalagaaffiata karsianut nakkartinneqartussaavoq.

Aningaasaateqarfimmi ullumikkut pisortaavoq Tupaarnaq Maqe. Taanna 2020-mi apriilip qaammataani atorfinitsinneqarpoq, taamalu aningaasaateqarfiup naatsorsuutaanik aaqqiissuteqarniarluni piffissamik atuigaatsiarsimagaluarluni, siulerisami kukkussutigisimasaanut attuumassuteqarani.

Taassuma Sermitsiaq.AG-mut ilisimatitsissutigaa, siulersuisut sapaatip akunnerani matumani kingusinnerusukkut ataatsimiinniartut.

Naatsorsuutit naammassineqangajalersut

- Ilisimatitsissutigisinnaavara, naatsorsuutit taakku marluk tunniunniarlugit suliarineqarnerat naammassineqangajalermat, Tupaarnaq Maqe ilisimatitsivoq. Aningaasaateqafimmit kukkunersiuisarfik Deloitte naatsorsuusiortinneqartarpoq.

Aningaasaateqarfimmi aqutsineq pikataarpasittutut isikkoqarpoq. Tassa Suliffeqarfiit Qitiusumik Nalunaarsorneqarfianni Ittumanngiiu Jensen Bianco qaammaterpassuanngortuni pisortaajunnaareersimasoq, pisortatut suli allassimasuuvoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER