Aningaasaateqarfik Kalaallit Nunaanni corona pillugu filmiliornissamut tapersiisoq

Coronamik ajornartorsiuteqarnermi assaa eqqortumik qanoq asanneqassappat, aamma oqartussat inassuteqaataat qanoq paasineqassappat?

UNICEF-ip video aqqutigalugu kalaallisut paasissutissatut suliaasa ilaat ikiorsiullugit kalaallit inuusuttut qulit 17-illu akornanni ukiullit paasissutissinniarpai.

UNICEF suliniummut 360.000 koruuninik Novo Nordisk Fondenimit aningaasaliiffigineqarsimasoq, aningaasaateqarfiup nittartagaani allassimavoq.

UNICEF-ip Kalaallit Nunaanni suliniutinut pisortaa Sara Olsvig ilisimatitsivoq, filmi siulleq suliniaqatigiiffiup nittartagaatigut aamma Youtubekkut takuneqarsinnaalereersoq. Tassani assaat qanoq errorneqartassanersut paasititsiniaassutigineqarluni:

Meeqqanut paasissutissiinissaq pingaaruteqartoq

- Coronap nunarsuarmi tuniluunnera aamma Kalaallit Nunaanni tuniluuttoqarsinnaanera ilungersunartuupput. Taamaammat meeqqanut aamma paasissutissiisarnissaq pisariaqartoq takusinnaavarput. Inuimmi tamaavimmik tuniluunnermik killileeqataasinnaapput. Taamaammat isumaqarpugut, videoliornissaq pingaaruteqartoq, Sara Olsvig oqarpoq nangillunilu:

UNICEF-imi paasissutissaliorlutik filmiliortut:

Aqutsisoq: Nuka Carmen Bisgaard

Ilitsersuisoq isiginnaartitsisartorlu: Kimmernaq Kjeldsen

Isiginnaartitsisartoq: Josef Tarrak-Petrussen

Isiginnaartitsisartoq filmimilu oqaluttoq: Ujarneq Fleischer

- Eqqumiitsuliortutut tunisassiortartutullu pikkorilluinnartut, Kalaallillu Nunaanni inuusuttut akornanni ilisarineqarsimalluartut sisamat suleqatigissallugit isumaqatigiissuteqarfigisimavavut, aamma oqariartuutiginiakkap kikkunnut tamanut anngunnnissaa qulakkeerniarlugu.

Videot Isumaginninnermi Aqutsisoqarfik suleqatigilluinnarlugu suliarineqarput, suliniaqatigiiffiullu nittartagaatigut ataasinngornerup tungaanut saqqummiunneqartassallutik.

Olsvigip ilisimatitsissutigaa, UNICEF coronamik akiuiniarnerminut Bikubenfondenimit aningaasaliiffigineqarsimasoq, taamalu meeqqanut inuusuttunullu paasissutissanik amerlanerusunik saqqummiussisinnaalersoq.

Aviisi paasissutissiisartoq aamma aningaasaliiffigineqartoq

Novo Nordisk Fonden 50 millioner koruuninik, coronamik ajornartorsiuteqarnermut akiuiniarluni paasissutissanik suliaqarnissamut, isumaginninnikkut ilisimatuussutsikkullu suliassanut tapiiffigineqarnissamut qinnuteqarfiusinnaasunik immikkoortitsisimavoq.

Tusagassiorfik Sermitsiaq.AG aamma immikkoortitanit aningaasaliiffigineqarsimavoq. Tusagassiorfik 241.881 koruuninik aningaasaliiffigineqarsimavoq, aningaasallu COVID-19 pillugu oqaatsit marluk atorlugit paasissutissanik saqqummiinissamut atorneqassapput. Aviisi aviisit Sermitsiap AG-llu saqqummersinneqarnerannut ilaasassaaq, sammineqartorlu netsikkut akeqanngitsumik atuarneqarsinnaasassalluni.

Aviisi paasititsiniutaasoq Nuummi inoqutigiinnut agguaanneqartassaaq, maannamut tunillatsissimasut tamarmik illoqarfiit pingaarnersaanni najugaqartuunerat pissutigalugu. Suliniut tusagassiorfiup Namminersorlutillu Oqartussani Peqqissutsimut Naalakkersuisoqarfiup suleqatigiinnerisigut naammassineqarsimavoq.

Aningaasaateqarfik: 50 mio. koruunit sinnerlugit atuiniarpasippugut.

Novo Nordisk Fondenip Sermitsiaq.AG-mut ilisimatitsissutigaa, immikkoortitat soqutigineqarluarsimasut, qinnuteqaaterpassuarnillu tunniussisoqarsimavoq. Taamaammat immikkoortitanik qinnuteqarnissamut periarfissaq tallimanngorpat danskit nalunaaqutaat malillugu ualikkut marlunut matuneqassaaq.

Soqutiginnittoqarluarnera pissutigalugu aningaasaateqarfimmit naatsorsuutigineqarpoq, 50 millioner koruunit immikkoortinneqareersut sinnerlugit atuisoqassasoq.