Aningaasaateqarfik ilinniagaqartunut pingasunut 200.000 koruuninik

Ivalo & Minik Fondenip siulersuisui aalajangerput legatinik pingasunik tunniussiniarlutik, kalaallit ilinniagaqartut Sverigemi, Korea Kujallermi Tuluillu Nunaanni ilinniarnerminnut atasumik pikkorissarnerannut ikiorsiissutitut.

Aningaasat Royal Arctic Line A/S-imit, Royal Greenland A/S-imit GrønlandsBANKEN-illu Inuussutissarsiornermut aningaasaateqarfianit kiisalu Nuna Fondimit tunissutaapput.

Ivalo & Mink Fonden pillugu

Ivalo & Minik aningaasaateqarfiat kalaallit kunngikkormiorpalaartumik ilinniartitaanermut aningaasaateqarfigaat.

Aningaasaateqarfiup Ivalo & Minik-p siunertaraa legatinik kalaallinut, nunani allani qaffasissumik ilinniarusuttunut imaluunniit nunani allani piginnaanngorsaqqikkusuttunut aningaasanik tunnissuteqartarnissaq aamma ilinniarnermut atatillugu sungiusaatigalugu nunani allani sullivinni kattuffinniluunniit sulisunut.

Aningaasaateqarfik Ivalo & Minik atserneqarpoq kunngikkormiutut ataqqinassusilik Prinsesse Josephine Sophia Ivalu Mathilda aamma kunngikkormiutut ataqqinassusilik Prins Vincent Frederik Minik Alexander, kunngikkormiutut ataqqinassusillip kunngissap Frederiup aamma kunngikkormiutut ataqqinassusillip Kronprinsesse Maryp qitornai atsiullugit.

Aningaasaateqarfik Ivalo & Minik NunaFondenimit 2012-imi pilersinneqarpoq.

Pissarsiffik: imf.gl

Aningaasaateqarfiup Sermitsiaq.AG-mut ilisimatitsissutigaa, leqatit pingasut taakku katillugit 200.000 koruuninik aningaasartaqartut. Aningaasaateqarfimmi siulittaasup Minik Rosingip leqatinik tunineqartut pilluaqquai:

Tamanut iluaqutaasussat

- Qularutiginngilara, tamarmik Kalaallit Nunaannut sinniisuussallutik naleqquttuusut. Taassuma saniatigut aningaasaliisimasut qutsavigaakka aningaasaliinermikkut inuiaqatigiinni akisussaaqataanermik annertuumik takutitsimmata.

- Taakku aningaasaliisimanngikkaluarpata Ivalo & Minik Fonden-imiit aningaasanik agguaasimasinnaanngikkaluarpugut, inuusuttut sinnattuinik piviusunngortitseqataasussanik aammalu Kalaallit Nunaanni ilinniarsimanerup qaffannissaanut qulakkeerinneqataasussanik, Kalaallit Nunaata silarsuarmi tamarmi ilisimaneqarnerulernissaanut aammalu Kalaallillu Nunaata silarsuarmut ilisimasaqarnerulernissaanik peqataasussanik. Inuiaqatigiinnut tamakkiisumik iluanaarutaasussatut isigaara, Minik Rosing oqarpoq.

Ivalo & Minik Fonden 2014-imiilli ilinniartunut 50-it ataatilaarlugit amerlassusilinnut legatinik tunniussisarsimavoq.

Ukiaanerani legatinik tunineqartut:

Pipaluk Lind Sverigemi Gõteborg Universitetimi kulturimut tunngasunik masteritut ilinniartoq legatimik tuineqarpoq.

Michael Platou Korea Kujallermi Pusan Universitymi koriamiut inooriaasiannik tunngasunik masteritut ilinniartoq legatimik tunineqarpoq.

Lærke Skifte Tuluit Nunaanni Londonimiittumi Center of Anxiety Disorders and Trauma in Maudsley Hospitalimi tarnip pissusaanik ilinniagaqarnissaminut legatimik tunineqarpoq.