Aningaasaateqarfik angerlarsimaffeqanngitsunut sullissivissamut millioninik tapiissuteqarniartoq
Oak Foundation Nuummi angerlarsimaffeqanngitsunut sullissiviup sanaartornissaanut 40 millioner koruuninik tapiissuteqarniarluni aalajangersimavoq.
Kommuneqarfik Sermersooq Nuummi angerlarsimaffeqanngitsunut sullissiviup sananeqarnissaanut atatillugu ikiorserneqarniarpoq.
Kommunalbestyrelsi suliniummut 80 millioner koruuninik aningaasaliissuteqareerpoq, aningaasaateqarfimmilli ilaqutariinnit pigineqartumit Oak Foundationimit nalunaarutigineqarsimavoq, aningaasaateqarfik suliniummut 40 millioner koruuninik tapiissuteqarnissamut akuersisimasoq.
Pilersaarut naapertorlugu angerlarsimaffeqanngitsut unnuisarfissaat inunnut 70-it missaanniittunut inissaqartitsissaaq, tassani arnat angutillu immikkut uffarfittalinnik perusuersartarfittalinnillu ineqartinneqassapput.
Tamatuma saniatigut immikkoortortaqarfeqassaaq inuiaqatigiinnut akulerutsinneqarniartunut 70-it missaanniittunut initalinnik, tassani najugaqarfiit tamarmik uffarfeqarlutillu perusuersartarfeqassapput. Immikkoortortaqarfiit taakku marluk ataatsimoortillugit ataatsimut isertarfeqassapput, oqaloqatiginnittarfeqarlutik ataatsimullu errorsisarfeqarlutik.
Ataatsimiititap suleqatigiinnerup ingerlateqqinneqarnissaa akuerisimagaa
Sanaartugassaq 2.000 kvadratmeterit sinnilaarlugit angissuseqassangatinneqarpoq, Nuummilu Kujallerpaat kujataata tungaani inissisimassalluni.
Aningaasaateqarfik suliniummut atatillugu kissaateqarpoq, kommunimillu maannakkorpiaq suliniutip qanoq isikkoqarnissaa pillugu aningaasaateqarfimmut isumaqatiginninniartoqarpoq.
Kommumi ingerlatsivik naapertorlugu, aningaasaateqarfimmit kissaatigineqartut ilagaat, arnat inuusuttullu suliniummi immikkut sammineqarnissaat. Kommunimi Suliffeqarnermut Isumaginninnermullu Ataatsimiititap siusinnerusukkut akuersissutiginikuuaa, ingerlatsiviup isumaqatigiissuteqarnissaq anguniarlugu aningaasaateqarfimmik suleqateqarnini ingerlatiinnaassagaa.
Kommuni tapiissuteqarnissaq pillugu Oak Foundationimut isumaqatigiissuteqassappat, kommunip angerlarsimaffeqanngitsunut sullissiviaamut aningaasaliissutimi annertussusaat allanngortissinnaavai, aningaasallu susassaqarfinnut allanut atorlugit.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...