Atuakkat
Aningaasaateqarfiit meeqqat minnerit oqaasiinik nukittorsaaqataassapput
Aasianni meerartaaqqammersunut atuakkanik tunissuteqarnikkut angajoqqaat meeqqaminnik atuffassisalernissaat periarfissinneqassaaq.
Aningaasaateqarfik Lauritzen aappassaanik Aasianni atuakkanik atorniartarfimmut aningaasanik tunissuteqaqqippoq, taamaasilluni suliniutigineqarsimasoq 2015-meersoq ingerlateqqinneqarsinnaalerluni. Taamani atuagaq "Ivalo Minillu", atuakkanik atorniartarfimmi naapeqatigiinnerni, aammalu peqqissaasup angajoqqaanngorlaanut pulaarneranni atuagaq akeqanngitsumik tunniunneqartarsimalluni.
Atuakkanik atorniartarfik nuannaartoq
Atuakkanik atorniartarfiup aqutsisuata, Marie Aamannip, nuannaarutigalugu nutaarsiassaq Sermitsiaq.AG-mut oqaluttuaraa.
Sapaatip akunnerata siuliani Aningaasaateqarfiup Lauritzenip suliniummut aningaasat 30.000 koruunit tunniuppaat, kingullermik tunniussaannit amerlanerujussuullutik.
- Kingullermik taama isiortoqarnera iluatsilluarpoq, angajoqqaanngorlaalli peqqissaasumut pulaaraangamik atuagaq pillugu apeqqutilliiuarsimasut, Marie Aamann oqaluttuarpoq.
2015-mi misiliilluni suliniut peqqissaasunit akeqanngitsumik tunniunneqartarnera iluatsilluarsimavoq.
Amerlanerit pissarsissapput
- Ukioq manna atuakkamik neqeroorfigisinnaasagut amerlanerussapput, nunaqarfiit illoqarfiillu amerlaneri tunissuteqarfigissavagut. Immikkut maluginiagassaavoq atuakkat marluussammata, tassani meeqqat utoqqaassusaat aallavigalugit atuagaq agguaanneqartassammata, siullermeerluni pulaarnermi, pulaarnerulli aappaani tassa meeraq 15-nik qaammateqalernerani, Marie Aamann paasissutissiivoq.
Atuakkat najukkami pisiarineqassapput, taamaasilluni atuagaarniafik Butik 3 aamma suliunummut iluaquserneqassalluni.