Aningaasaateqarfiit aalisarnermi piginneqataasinnaapput
Aalisarneq pillugu ataatsimiititaliarsuup aalisarnerup nukittorsarnissaa anguniarlugu nunanit allanit aningaasaliisussarsiornissamut periarfissat misissussavai
Aalisarnerup ineriartortinnissaanut ajutooriaannaanertik nalunagu aningaasaleerusuttunik pisariaqartitsisoqarpoq, tassanilu danskit nunanilu allanit soraarnerussutisiassanut ileqqaakkanik aningaasaateqarfiit aningaasaliisartullu namminersortut atorluarneqarsinnaapput. Tamanna aalisarneq pillugu ataatsimiititaluarsuup suliassaani, tallimanngormat saqqummiunneqartumi, qulaajangassaat ilaattut ilanngunneqarsimavoq.
Qulequttami 'Ajutooriaannaanertik nalunagu aningaasaleerussutunik pissarsiortarneq, tassunga ilanngullugit soraarnerussutisiassanut ileqqaakkanik aningaasaateqarfiit inuussutissarsiummi piginnittunik aaqqissuussinermi ilanngunnissamut periarfissarisinnaasaat'-ni ima allassimavoq:
- Aalisarnermi inuussutissarsiuteqartut ajutooriaannaanertik nalunagu aningaasaleerusuttunik pisariaqartumik qanoq pissarsiortarsinnaanerat ataatsimiititaliarsuup qulaajassavaa. Aalisarneq ineriartorteqqinniarlugu kinguaariillu siunissami nikinneri aningaasalersornissaannut nunanit allanit allatulluunniit namminersortunit aalisarnermut ajornannginnerusumik annertunerusumik aningaasaliisoqarsinnaaneranik pisariaqartitsinermik misissuissaaq.
- Soraarnerussutisiassanut ileqqaakkanik aningaasaateqarfiit aningaasaliisartulluunniit allat aalisarnermik inuussutissarsiummi piginnittuunermik aaqqissuussinermut ilanngussinnaanerat nalilersorneqassaaq, taamaalilluni qulaajarneqassalluni aningaasaliisoqarnissaanik periarfissaqarnerulersitsisoqarsinnaanersoq tamaattoqassappallu tamassumani sunik piumasaqaateqartoqassanersoq. Periutsini assigiinngitsuni iluaqutit ajoqutillu allaaserineqassapput.
Ataatsimiititaliarsuaq aalisarneq pillugu inatsisissamut nutaamut isumaliutissiissummik suliaqarnissaminut ukiup naaneranut periarfissaqarpoq.