Aningaasaasaq Ilulissani nassaarineqartoq

500 koruuni peqquserlunnikkut sananeqarsimasoq Ilulissani politiinit arsaarinnissutigineqarpoq. Aningaasaasaq Hotel Arcticimi ullut 14-it kingulliit ingerlaneranni akiliutigineqarsimavoq. Aningaasaasamik peqquserlulluni sanaamik ataasiinnarmik maannamut nassaartoqarpoq.

Kalaallit Nunaanni Politiit Facebookimini taama ilisimatitsipput.

- Aningaasaasaliaq ataasiinnaq maannamut nassaarineqarpoq, peqquserlullunili sanaaq aningaasavimmut eqqaanarluinnarpoq, qalipaataa angissusaalu eqqarsaatigissagaanni. Aningaasat atussagussigit nakkutiginnilluarniarisi, politiit facebookiminni ilisimatitsipput.

Pasisaqartoqanngilaq

Ilulissat Politiivi suliami peqquserlussimasutut maannamut pasitsaassaqanngillat, suliarli sakkortuutut isigineqarpoq.

Aningaasanik peqquserlulluni sanasoqarsimatillugu pinngitsoorani pineqaatissinneqarsimasunut inissiisarfimmik kinguneqartitsinissaq anguniarneqartarpoq, sivisussusaalu peqquserluutip annertussusaa malillugu aalajangerneqartarluni, Kalaallit Nunaanni Politiit ilisimatitsipput.

- Aningaasanik peqquserlungasi. Paasigutsigu piaarnerpaamik qisuariarfiusarpoq, tamannalu ilinnut akisusinnaavoq, allassimavoq.

Ilisarnaatai misissorsigit

Kalaallit Nunaanni Politiit innuttaasunik kaammattuipput aningaasanik tigummiaqarunik tigusingunilluunniit aningaasat ilumoortuunersut misissoqqullugit.

Aningaasap ilisarnaatai qillarissut titarnerillu taakkuupput aningaasaasap 500 koruunip amigaatigisai. Tassa aningaasaviit ilisarnaataat, politiit allapput.

Aningaasaq peqquserlulluni sananeqarsimasoq National Kriminalteknisk Centerimut Danmarkimiittumut nassiunneqarpoq, tassanilu misissugassanngortinneqarluni.