Skip to main content

'Angutivik' danskit isiginnaartitsissusiaannut nersornaasiuttakkamut innersuunneqartoq

Isiginnaagassiaq angummut kalaallimmut tunngassuteqartoq Danmarkimi nuannarineqarluarmat, isiginnaartitsisartut peqataasut nuannaarput.

Naliliinerit pitsaasut, isiginnaartunit nuannarineqarneq maannalu aamma Aarhusimi Performing Arts Platformip isiginnaartitsisartunut nersornaasiuttagaannut innersuunneqarneq.

Nunatsinni isiginnaagassiaq nuannarineqarluartoq 'Angutivik' Danmarkimi aamma nuannarineqarluarpoq. Ukiumilu isiginnaagassiatut nuannernerpaatut innersuunneqartuni pingasuni ilaalerpoq.

- Tamanna uagutsinnut isumaqaqaaq, isumaqarpormi Nunatta Isiginnaatitsisarfia Danmarkimi nittarsaanneqartoq, taamaasillutik nalunnginnerulissavaatigut, Klaus Geisler, angutini isiginnaartitsisuni sisamaasuni ilaasoq oqarpoq. Kristian Mølgaard, Hans-Henrik Poulsen aamma Miki Jacobsen isiginnaartitseqataapput.

Nuannarineqarluartoq

Isiginnaartitsisut naatsorsuutigisimanngilaat 'Angutivik' Danmarkimi nuannarineqarluassasoq.

- Isiginnaartitsissutip takutinnginnerani pissangavugut. Kalaallit Danmarkimiittut isiginnaagassiamik takunnissinnaanerat nuannaarutigaarput; paasinarsivorli isiginnaariartut amerlanersaat qallunaajusut - tamanna tupaallannarlunilu nuannerpoq, Klaus Geisler oqarpoq.

- Periarfissinneqarpugut takutitsissalluta kikkuunerluta, Danmarkimilu kalaallinut isumaliutiinnakkat pillugit sammisaqarsinnaalluta.

Malunnarluinnartumik nunatsinni Danmarkimilu isiginnaariartut isiginnaartitsissut assigiinngitsunik qisuariarfigaat. Angutit nunatsinneersut isiginnaartitsissummi imminnut ilisarisinnaalluartut, qallunaat isiginnaarnerminni angut kalaaleq aatsaat naapippaat.

- Isiginnaariartunit nuannarineqarluarpugut. Isiginnaartitsinerup kingorna oqaloqatiginnilluarpugut, isiginnaariartullu oqartarput takutitarput tupaallannaannartumik nuannersoq. Takutissimavarput kikkuunerluta, isumaliutigiliinnakkanillu piiaasimalluta.

‘Ilisarnartoq’

Innersuussinermilu tamanna aamma tunngavilersuutigineqarpoq.

- Kalaallit pillugit isumaliutigiliinnakkanik tamangajatta peqarunarpugut: Inuk qaqqami aputaannaasumiittoq, imaluunniit inuk illoqarfissuup ineriartornerani qimataasimasoq silami issiavimmiittoq. Isiginnaartitsisartulli sisamat allarluinnarmik takutitsipput: angutit piumassusermik ulikkaartut; maqaasineq quujasaarnerlu. Takusat assigiinnginneri malunnarput, siullermik angutit pingasut kinaassusaat ilisarnarnerallu ersarissoq, taamatullu inuiaqatigiinni isumaginninnermi, aningaasaqarnermi politikkikkullu allanngoriartorneq sukkasooq, innersuussinermi allaqqavoq.

Tallimanngornermi januaarip 25-ani nersornaasiisoqassaaq, taassumalli tungaanut una toorlugu 'Angutivik' toqqarneqarsinnaavoq.

Isiginnaartitsissusiarli nersornaaserneqanngikkaluarpalluunniit nersualaarineq tulleq takkutereerpoq. Nuannarineqarluarnera pissutigalugu 'Angutivik 2020-mi Danmarkimi takutinneqaqqissaaq.

Isiginnaartitsissusiaq Niviaq Korneliussenimit allanneqarpoq, Hanne Trap Friisilu ilitsersuisuulluni.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER