Angutit ulluat: Angutit Oqaloqatigiiffii qasukkartitsisarput

OBS: Peqqissutsimut Naalakkersuisup, Anna Wangenheimip ullormut atatillugu oqaaseqaatigisaata ilaa ilanngunneqarpoq nal. 15.40.

Ulloq 19. november tassaavoq nunarsuaq tamakkerlugu angutit ulluat. Ulloq taanna malunnartinniarlugu angutit oqaloqatigiiffii angutinut tamanut kaammattuuteqarput: Misigissutsit oqaloqatigiissutigisigit.

Anda Poulsen ukiuni arlalinngortuni Nuummi angutit oqaloqatigiiffiannik ingerlataqartuuvoq. Angutit ataasinngornerit tamaasa naapittarput, misigissutsit, aqqusaakkat eqqarsaatillu pigisatik pillugit oqaloqatigiittarlutik. Nanortalimmi aamma angutit oqaloqatigiiffeqarput. Illoqarfinnilu sisamaasuni allani oqaloqatigiiffiit ilaat piffissat ilaanni ingerlanneqartarput, unittoortarlutilli.

Nassuersinnaaneq pingaaruteqarpoq

Anda Poulsen Sermitsiaq.AG-mut nassuiaavoq nunatsinni angutit misigissutsitik pillugit oqaasinnguisinnaanermut ilungersuuteqarsinnaasartut.

Taanna nassuiaavoq angutit ilaqutariinnerminni, inooqateqarnerminni, perorsaanerminniluunniit ajornartorsiuteqarsinnaasartut. Oqaloqatigiiffiit tamakkununnga oqilisaasinnaasarput:

- Angutaasugut nassuernissarput pisariaqarpoq, tassami misigissutsit nammineq pigiinnarneri peqqinnanngilaq. Inuit tamarmik misigissuseqarput, aamma angutit. Misigissutsit nammineq pigiinnarsinnaanngillat, ilinniartariaqarpoq oqaasinnguisinnaaneq. Taamaaliunngikkaanni asasagut timikkut tarnikkulluunniit annersinnissaat pinngitsoortinniarlugu, oqarpoq.

- Angutit oqaloqatigiiffii tassani pitsaasuupput. Ajornartorsiutit pillugit oqaloqatigiinnermi qasukkarnarsinnaavoq, tusarnaarneqarluni, annissuilluni paasineqarlunilu.

Persuttaanerit tamanut tuttarput

Naligiissitaaneq peqqissutsimut naalakkersuisoqarfiup ataaniippoq. Peqqissutsimut Naalakkersuisoq, Anna Wangenheimip nassuerutigaa persuttaanerit amerlanerpaat angutinit piliarineqartartut.

Aammali erseqqissarpaa angutit aapparminnit timikkut tarnikkullu persuttarneqartarnerat ersarissarneqartuartariaqartoq:

- Angutit timikkut tarnikkullu aapparminnit persuttarneqartartarnerat maluginiartarparput, imaluunniit paqumigiinnarparput? Imaluunniit isuma pigiliutiinnagaalersimava angutit namminneertuartariaqartut maalasussaanngitsullu, Anna Wangenheim aperivoq.

Ilanngullugu ilisimatitsissutigaa qanigisariit akornanni persuttaasarneq pillugu Naalakkersuisut upernaaq 2021-mi isumasioqatigiissitsinissamik pilersaaruteqartut.

Ilisimaneqanngitsut arlallit

Anda Poulsen isumaqarpoq politiit ukiumut nalunaarusiarisartagaat nalunaarsuinerillu allat ersarilluinnartumik takutitsisut:

- Nalunaarsuinerit takutippaa, angutit ajoraluartumik nukersorlutik suli takutitsisartut. Aamma oqarsinnaavunga angutit tarnikkut timikkullu persuttaasartut arlaqarsinnaasut qassimmita nalunaarutigineqarsimanngillat, tassa aamma ilisimaneqanngitsut, Anda Poulsen oqarpoq.

Taassuma kaammattuutigaa angutit oqaloqatigiittarfii illoqarfinni nunaqarfinnilu arlalinni pilersinneqassasut.