Angutit marluk qimmerlu qimuttoq ataaseq annanneqartut

Piniartut marluk Kullorsuarmeersut ataasinngormat annanneqarput

Angutinik annaassiniartoqarnerata nalaani assilineqartoq

Angutit marluk, 55-nik aamma 34-nik ukioqartut, ajornartorsiulersimasut pillugit politiit ataasinngormat nalunaaqutaq 16.45 nalunaarfigineqarput.

- Sikumi saattumiilersimanerat pissutaalluni ingerlariaqqissinnaajunnaarsimapput, qimmit aamma immamut nakkartarsimallutik. Nunaqarfimmioqataasa ikiorniaqqaarsimagaluarpaat, tamanna iluatsissinnaasimanngimmat qulimiguulimmik annanneqartariaqarsimapput, politiinit Lars Even Sermitsiaq.AG-mut oqarpoq.

Qimmit aqqanillit qimaannarneqartariaqartut

Qulimiguulik sikumut missinnaasimanngilaq.

- Taamaattumik angutit taakku marluk qimmerlu ataaseq amuneqarput. Qimmit sinneri, aqqaniliusut, qimaannartariaqarsimavaat, Lars Even oqarpoq.

Angutit ajoqqusersimanngitsut ilisimatitsissutigineqarpoq, qimmillu qimuttut aqqanillit qimaannarneqarsimasut ullumi inuttaminnit aaneqassasut aamma ilisimatitsissutigineqarpoq.

Powered by Labrador CMS