Angutit klubbiat
Partiini naalakkersuisoqataasuni arnat pingasuinnaat Inatsisartunut qinigaapput
Naalakkersuisoqatigiit isumaqatigiissutaat tallimanngormat saqqummiunneqarmat, angutit sisamat allagartamut uppernarsaammut atsiortuupput. Partiini siulittaasut angutaanerat kisimi apeqqummiinngilaq. Ataatsimut isigalugu partiini naalakkersuisoqataasuni arnat amerlanngillat.
Partiit taakku sisamat Inatsisartunut qinigaatitaannit 16-iusunit, arnat pingasuinnaapput. Taakku tassaapput Doris J. Jensen, Vivian Motzfeldt aamma Laura Taunâjik.
Naalakkersuiusut aamma toqqarneqareeraluarpata, sinniisullu ilaasortanngortinneqarlutik, tamanna pitsaanerulernavianngilaq.
Angutit sinniisuussapput
Aleqa Hammondip sinniisussatut siullertut Vittus Qujaukitsoq paarlassagaa ilimanarpoq, taassuma naalakkersuisunngornissaa ilimanarmat.
Kisianni Partii Naleqqami imaluunniit Atassummi, arnamik sinniisutut Inatsisartunut ilaasortanngortussaqanngilaq. Atassummi Panínguak´ M. Kruse sinniisut pingajuattut inissisimavoq, Partii Naleqqamilu Malene Broberg sisamaattut inissisimalluni.
Kim Kielsenip Doris J. Jensen, Vivian Motzfeldt imaluunniit Laura Taunâjik naalakkersuisusutut toqqassagunigit, Inatsisartuni ilaasortat arnartaat ataatsimik ikileriarnerik kinguneqassaaq. Tassami Siumumi sinniisussat tallimat tamarmik angutaapput.