Skip to main content

Angutit assammik arsarnermi GM-ernissaat: Unammisartoqatigiit arfinillit kuultinnanniutissapput

Angutit assammik arsarnermi Nunatsinni Pissartanngorniunnerat ullumi allartinneqassaaq. Unammiuaarnerit Inussivimmi Nuummiittumi ataasinngornermiit sapaammut ingerlanneqassapput.

Ullumi ataasinngornermi maajip qulingani Nunatsinni angutit assammik arsartartut pissartanngorniunnerat aallatippat, unammisartoqatigiit arfinillit kuultinnanniutissapput.

Unammisartoqatigiit marluk NÛK Nuummeersut aamma Akuleriit, illoqarfinnit arlalinnit unammisartullit unammersuarneq ammarlugu unammeqqaartuussapput. Dommeri Nuummi Inussivimmi unaminnissaq siulleq aallarnerlugu nalunaaqutaq ataatsimut aallartitsissaaq.

Kalaallit Nunaanni Assammik Arsartartut Kattuffiianni, TAAK; siulersuisuni ilaasortap naatsorsuutigaa unammiuaarnerit sapaatip akunnerani ingerlanneqartussat pissanganassasut.

- Ukiuni kingullerni marlunni pissartanngorniuttoqarsimanngilaq, taamaammat unammisartut unammerusussuseqarluarnissaat naatsorsuutigaarput. Unammilluartoqassangatipparput aamma katersuunnissamut killilersuinerit qasukkarneqarsimanerat nuannaarutigaarput, taamaalillutami isiginnaartoqarluassagatta, TAAK-imi siulersuisuni ilaasortaq Jørgen Isak Olsen Sermitsiaq.AG-mut oqarpoq.

Unammisartutut misilittagartuut piareersimasut

Taassuma oqaatigaa, Aqissiaq Maniitsumeersoq tupaallatsitsisinnaasoq, aamma kikkut ajugaassanersut siumoortumik oqaatigineqarsinnaanngitsoq.

- Qatanngutigiimmi Kreutzmannikkut, Akutaaneq Angutimmarillu Kreutzmann, Pan-Am-imi unammisarnermikkut ilisimaneqarluartut Aqissiami unammeqataasussaapput. Qularutiginngilara taakku unammersuarnermi maluginiagassaassasut, Jørgen Isak Olsen oqarpoq.

Taassuma aamma unammisartoqatigiit allat isiginnaarnissai qilanaarai, erseqqissaatigalugulu unammisartoqatigiit tamarmik arsallammattaqartut isiginnaarianit qilanaarineqarsinnaasunik.

Uku Nunatsinni Pissartanngorniutissapput:

  • NÛK, Nuuk
  • Akuleriit, illoqarfinnit assigiinngitsuneersut
  • N-48, Ilulissat
  • Aqissiaq, Maniitsoq
  • Norsaq HC, Aasiaat
  • GSS, Nuuk

Angutit assammik arsarnermi Nunatsinni pissartanngorniunnerani pisussat Kalaallit Nunaanni Assammik Arsartartut Kattuffiata Facebookiani takusinnaavatit.

 

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER