Angutit assammik arsaattartut: Kalaallit Savalimmiunut ajorsaqqittut
Kalaallit Nunaanni angutit nunanut allanut assammik arsaattartui Savalimmiunut unammeqqinnerminni ajorsaraluartut, unammineq ippassarnit pissanganarnerullunilu uummaarinneruvoq. Unammineq naammassimmat Savalimmiut ajugaapput, 29-19-imik siuaqqallutik.
Angutit nunanut allanut assammik arsaallutik unammiartartui unammineq aallartimmat piareersimanerungaatsiarput.
Savalimmiunut unammeqqinnerminni minutsini siullerni unammisut naligiinginnarput.
Kalaallit Nunaata assersuisui iluatsinnerupput, Savalimmiormiullu arsat isertissinnaasaralui ikinnerullutik.
Savalimmiormiulli assersuisutik aamma sukaterpaat. Kalaallit unammisartui arlalitsigut kukkuluttortaalermata, tamanna savalimmiormiut atorluarpaat, unikkallarnermilu Savalimmiut siuaqqavoq, unammineq unikkallarnermi 17-10-mik siuaqqalerami.
Misilittagallit nutaallu
Kalaallit unammisartui akuugaalluarput, ilaat misilittagaqarnerugamik, ilaallu nutaajullutik.
Savalimmiormiut unamminerminni sukkasuumik saassussisarnertik sukkasuumillu tunioraattarnertik attatiinnarpaat, unamminerullu ilaani målinik aqqanilinnik siuaqqaleraluarlutik.
Kalaallilli ippassarnit arsarluarnerupput. Tamannali naammanngilaq, unammisatimmi arsanik isaatitsinertigut angusinnaanngilaat. Taakku sukkasuumik aalaakkaasumilli ajugaanissaminnut arsaapput.
Unamminermi dommeri naggammik siggarmat Savalimmiut ajugaapput, unammineq 29-19-imik inerneqarami.