Angutit assammik arsaattartut: Kalaallit Nunaat Savalimmiunut ajorsarpoq

Nunatsinnit angutit nunanut allanut assammik arsaallutik unammisartui arfininngornermi Savalimmiunut unammeqqaarput, Savalimmiormiullu siuarsimangaatsiarlutik. Unammineq naammassimmat Savalimmiut ajugaapput, 37-22-mik ajugaangamik.

Kalaallit savalimmiunut unamminermi malinnaaniaraluarput. Kinguapallallutilli.

Angutit nunanut allanut unammisartui arlalitsigut kukkuluttortaarmata, tamanna savalimmiormiut atorluarpaat.

Assammik arsaattartut nunanut allanut unammisartuisa Ingi Olsenip unamminermi qaningaatsiarnissartik ilimagisimagaluarpaa.

- Savalimmiunut unamminermi immitsinnut qanittarpugut. Unamminerilli marluk ajugaaffiginiassallugit siunniuteqqavarput, assammik nunanut allanut unammisartut sungiusaasuat, Ingi Olsen, Sermitsiaq.AG-mut januaarip arfineq-pingajuani oqarpoq.

Unikkallarnermi 18-11

Unamminermi unikkallalernermi Savalimmiut straffertinneqarput, Akutaaneq Kreutzmann kukkuluttormat. Taanna unamminerup sinnerani unammeqataasinnaajunnaartillugu anisinneqarpoq.

Taatsiannguaq Olsenip arsaq straffernermi annaappaa. Unikkallarnermili Savalimmiut siuaqqavoq, 18-11-mik inerneqarami.

Pan-Am-ip kingorna unammineq siulleq

Kalaallit assammik nunanut allanut unammisartui, Pan-Am-ip kingorna aatsaat unammeqatigeeqqipput. Pan-Am-imi anngunniunnermi tulleriinni sisamaattut inissipput, taamaasillutik Nunarsuaq tamakkerlugu pissartanngorniunnissanut anngunniunnissanut peqataanngitsoorlutik.

Unamminerup naajartornerani kalaallit arsaq tigulluarniartaraluarpaat.

Måliniittup Taatsiannguaq Olsenip arsaq arlaleriarluni annaattarpaa, tamassumali kalaallit unammisartuisa siuartissinnaanngilai.

Unammineq naammassimmat Savalimmiut ajugaapput, unammineq 37-22-mik inerneqarami.

Kalaallit Nunaat Savalimmiunut ajugaanissaminut aqagu periarfissaqaqqissaaq, tassami Høllini í Vestmannimi aqagu kalaallit nalunaaqutaat malillugu marlunut unammeqqissagamik.

Powered by Labrador CMS