Skip to main content

Angutit arnanit 28 procentimik isertitaqarnerusimasut

Inuit isertitaat 2019-imi agguaqatigiissillugit 6.000 koruuninik qaffassimapput. Nunalli immikkoortuisai assigiinngitsut akornanni aamma arnat angutillu akornanni isertitarineqartartut suli annertuumik nikingassuteqartut, Naatsorsueqqissaartarfiup kisitsisaataasa nutaat takutippaat.

Kalaallit Nunaanni inuit agguaqatigiissillugit isertitaat 2019-imi akileraarutit suli peernagit 259.000 koruuninut qaffassimapput. 2018-imut sanilliullugu 6.000 koruuninik qaffassimallutik, tamanna Naatsorsueqqissaartarfiup naatsorsuutaani kingullerni takuneqarsinnaavoq.

Naatsorsuutit naapertorlugit Avannaata Kommuniani isertitat qaffannerpaasimapput, inuit isertitaat aqquaqatigiissillugit 4,1 procentimik qaffassimallutik, tassa ukiumut 215.000 koruuniniit 224.000 koruuninut qaffassimagamik.

Kommuneqarfik Sermersuumi isertitat 0,9 procentimik qaffassimanerat annikinnerpaavoq, tassa 301.000 koruuniniit 303.000 koruuninut. Illoqarfiilli pingaarnersaata kommuniani innuttaasut agguaqatigiissillugit qaffasinnerpaanik suli isertitaqartoqartarpoq.

Naatsorsueqqissaartarfiup titartagartaliussaa

Nunap immikkoortuini annertuumik nikingassuteqartoqartoq

Naatsorsueqqissaartarfimmit aamma nunap immikkoortuini assigiinngitsuni 18-ini, siusinnerusukkut kommuniusimasuni 18-ini isertitat naatsorsorneqarsimapput.

Tassani nunap immikkoortui marluk sumiiffinnit allanit isertitaqarfiunerusimapput:

- 2019-imi agguaqatigiissillugu Nuummi 331.235 kr.-t isertinneqarsimapput, Sisimiut distriktianut sanilliullugu 24 pct.-inik tamanna qaffasinneruvoq. Distriktini allani tamani Kalaallit Nunaanni isertitat tamarmiusut agguaqatigiissinnerinit appasinnerupput, Naatsorsueqqissaartarfik allappoq.

Kangaatsiami ukiumut inuit isertitaat agguaqatigiissillugit 159.000 koruuniusimapput.

Isertitat tamarmiusut 0,6 procentimik qaffassimasut

Naatsorsueqqissaartarfiup aamma naatsorsorsimavai, isertitat qaffaassutaat inuit nioqqutissanik amerlanerusunik pisiaqarsinnaanerannut atorneqarsinnaannersut imaluunniit pisiassat akiisa qaffassimanerannit sunnerneqarsimanersut.

Tassunga atatillugu Naatsorsueqqissaartarfimmit naatsorsorneqarsimavoq, 2019-imi isertitat tamarmiusut 0,6 procentimik qaffassimasut.

Isertitat tamarmiusut 2002-miit 2019-imut 10,1 procentimik qaffassimmapput.

Angutit arnanut sanilliullutik 28 procentimik isertitaqarnerusimasut

Suiaassutsit akornanni aamma agguaqatigiissillugit isertitat nikingassuteqangaatsiarput:

- 2019-imi angutip agguaqatigiissillugit isertitai tamarmiusut 288.000 koruuniupput, arnallu isertitai 226.000 koruuniullutik, Naatsorsueqqissaartarfik allappoq.

Tassa 28 procentimik nikingassuteqarput.

Naatsorsueqqissaartarfiup ilisimatitsissutigaa, angutit sulisinnaasut, arnanut sulisinnaasunut sanilliullugit amerlanerunerat naatsorsuutini ilanngunneqarsimanngitsoq, angutit amerlanerusut sulisinnaasut ukiui isertitaqqortunerpaaffiup nalaaniimmata, utoqqaallu akornanni tassa isertitakinnerpaani arnat amerlanerummata.

- Taamaattumik isertitat nikinganerat kisitsisinit ersersinneqartunit appasinneruvoq, naatsorsueqqissaartarfik allappoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER