Angutip ujaarineqartup umiatsiaaraa nassaarineqarpoq

Pingasunngormat unnulluinnartoq umiatsiaaraq, angutip marlunngormat unnuakkut Tasiilamit aallarami atugaa nassaarineqarsimavoq. Umiatsiaaraq inuttaqanngilaq, politiillu angummik ujaasinertik ingerlatiinnarpaat.

Kalaallit Nunaanni Politiit, 20-nik ukiulik Jonas Asser Kunak marlunngormat Tasiilami kingullermik takuneqarsimasoq, pingasunnormat ujaarilerpaat. Umiatsiaaqqamik ammaannartumik illoqarfimmiit aallartoq takuneqarsimavoq.

Kalaallit Nunaanni Poliit pigaartuisa pisortaata Lars Evenip Sermitsiaq.AG-mut ilisimatitsissutigaa umitsiaaraq nassaarineqarsimasoq:

- Umiatsiaaraq nassaaraarput, inuttaajunngitsoq. Umiatsiaaraq inuttaqanngilaq, aallarfiatalu kitaata tungaani nassaarineqarluni. Umiatsiaaraq pingasunngormat unnukkut nassaarineqarami avasissumiissimavoq, pigaartut pisortaat oqarpoq.

Politiit angut 20-nik ukiulik ullaaq manna ujaaralugu ingerlaqqipput:

- Ujaarineqartoq nassaarinngilarput, taamaammat ingerlaarfigisimasaata tungaanut sineriak sinerlugu ujaasinerput silaannakkut ingerlateqqipparput. Taamaaliorpugut nunamukarsimasinnaanersoq takuniarlugu. Ujaasineq ullaaq manna qulingiluat qeqqanut qulimiguulimmik nanginneqarpoq, pigaartut pisortaat oqarpoq.

Ujaarineqartup sumut ingerlasimasinnaaneranik politiinut paasissutissaateqartoqarpat, politiit oqarasuaat 701448 aqqutigalugu attavigeqquneqarput.

Powered by Labrador CMS