Skip to main content

Angutinik maqaasineqartunik pingasunik ujaasineq taamaatinneqarpoq

Angutit pingasut weekendimili maqaasineqartut ujaarineqarnerat taamaatissallugu, oqartussat tallimanngornerup unnuaani aalajangerput.

Angutit pingasut Qeqertamit Ilulissanukarlutik angalasut arfininngormalli maqaasineqartut ujaarineqarnerat, oqartussat maanna taamaatippaat.

Pingasunngornermi ualikkut Issittumi Sakkutooqarfiup maqaasineqartut umiatsiaat timmisartumik Challengerimik sumiissusersivaat, kisianni ajoraluartumik angutit maqaasineqartut pingasut nassaarineqanngillat.

Umiatsiaaraq kivingajassimavoq, Qeqertarsuullu kujataani 20 kilometerit missaannik ungasissusilimmi nassaarineqarpoq, taannalu sisamanngornermi ullaap tungaani nunamut kalinneqarpoq.

Sisamanngornermi Issittumi Sakkutooqarfiup Air Greenlandip qulimiguuliutaanik sumiiffimmi umiatsiap nassaarineqarfiani ujaasivoq – ajoraluartumik kinguneqanngitsumik. Ujaasisoqarnerani umiarsuaq alapernaarsuut Lauge Koch aamma angalatinneqarpoq, taamatullu aamma Kalaallit Nunaanni Politiit angallatinik arlalinnik ujaaseqataatitsipput.

Aalajangerneq ajornakusoortoq

Ujaasinerup ataasinngormalli ingerlasup taamaatinneqarnissaa aalajangerneqarsimasoq, Issittumi Sakkutooqarfiup tallimanngornermi nalunaarutigaa.

Taamatut aalajangerneq ajornakusoortuaannarpoq, kommandørkaptajn Brian Jensen oqarpoq:

- Ullut unnuillu arlallit peqataasorpassuaqartillugu ujaasisoqarnerata kingorna, maqaasineqartut taakku pingasut ajoraluartumik nassaarisinnaanagit paasivarput.

- Ujaasinermik unitsitsilluni aalajangerneq ajornartarpoq, qanigisaasut suli akissutisinngitsut, kisianni maanna suliaqarnerup taamaatinnissaanut piffissanngortoq, oqartussanit ataatsimut nalilerneqarpoq, Brian Jensen, Issittumi Sakkutooqarfimmeersoq oqarpoq.

Najugaqartut nersualaarai

Kommandørkaptajni najugaqartunut ikiuuttunut nersualaarinnippoq:

- Najugaqartut taama amerlatigisut ujaasinermut peqataanerat isumassarsinarpoq, taamatullu suliaqarnerminni nersualaagassarujussuupput, Brian Jensen oqarpoq.

Qanigisaasut suliap inernera pillugu nalunaarfigineqarsimasut, Issittumi Sakkutooqarfik ilisimatitsivoq.

Suliami paasissutissanik nutaanik takkuttoqassappat, Kalaallit Nunaanni Politiinut 70 14 48-mut tunniunneqarsinnaapput.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER