Angutimmarik Nunatsinnut angerlalerpoq
Assammik arsartartoq Angutimmarik Kreutzmann ukiuni 15-ni nunani allani najugaqareerluni Maniitsumut angerlartussanngorpoq. Assammik arsarnermi aamma isikkamik arsaannermi GM-eqataasalernissani qilanaaraa
Assammik arsarluni nunanut allanut unammisartoq, 32-nik ukiulik Angutimmarik Kreutzmann, Maniitsumut angerlartussanngorpoq.
17-nik ukioqarluni illoqarfik qimappaa, Danmarkimi, Sverigemi aamma Tysklandimi unammisartuusimalluni.
Angerlarserneq
- Ukiup aappaa avillugu eqqarsaatigaara angerlarusullunga, angerlarsernera tassunga pissutaavoq, aamma ukiuni 15-ni nunani allaniinnikuunera naammagilerakku angerlarnissannut piffissanngortoq aalajangerpunga. Taamatulli aalajangerniarneq oqitsuinnaanngilaq, IT-supporterisut qaammatip tulliani naammassiutigaluni misilitsittussaq Angutimmarik Kreutzmann oqarpoq.
- Angerlarnissannut suna qilanaarinersaaviuk?
- Ilaquttakka ikinngutikkalu ilagisinnaalernissai aamma pinngortitamiittaleqqinnissaq qilanaareqaara. Ataasiaannarlunga assammik arsarnermi aamma isikkamik arsaannermi GM-eqataanikuuvunga, taamaattumik GM-eqataasalernissakka qilanaareqaakka. Danmarkimili aamma taamaattoq maqaasisassaqarpunga soorunami, soorlu unamminerit, qaffasissumik sungiusarnerit allarpassuillu. Danmarkimi unammisartuuinnarnissamut neqeroorfigineqaraluarpunga, angerlarusunnerali ajugaavoq, akivoq.
- Danmarkimi unammisartuuninni suna puigunaannersaava?
- Nordsjælland Håndboldimi unammisartuullunga Aalborgimut unammilluta 2014-mi, tassanu unammineq naammassilluinnaliivissoq unamminermi isertitaq kingulleq isertippara. Ukiormi tassani Aalborg Danmarkimi pissartanngorput.
Ineriartortitseqataarusunneq
Nunatsinnut angerlaruni assammik arsarnerup tungaatigut ineriartortitseqataarusulluni oqarpoq.
- Maniitsumiinnaanngitsoq ineriartortitseqataarusuppunga. Ineriartornissamut periarfissaqarluartoqarpoq, neriuppunga misilittakkakka ingerlateqqissinnaassallugit. Aamma maanna nunanut allanut unammisartuusunut kingoraartissanut ineriartortitseqataarusuppunga, oqarpoq.
Taastrupimeersut TIK Håndbold Danmarkimi andendivisionimi unammisartut unammisartuuffigiunnaarpai. Februaarimi kingullermik unammeqataavoq.