Angut Uummannap eqqaani ujaarineqartoq ajunngitsoq nassaarineqarsimavoq
Angut Illorsuarmiit pingasunngornermi aallarsimasoq Uummannamut sisamanngornermi tikittussaasimagaluartoq suli tikissimanngilaq. Issittumi Sakkutooqarfimmit taamaammat angummik ujaasineq aallartinneqarsimavoq.
Angutip nassaarineqarsimanera pillugu paasissutissaq ilanngullugu ilanngutassiaq 14.30 nutarterneqarpoq.
Issittumi Sakkutooqqaqarfimmit sisamanngornermi ualikkut ilisimatitsissutigineqarpoq, angut ujaarineqartoq najukkami umiatsialimmit nassaarineqarsimasoq. Angut pineqartoq nunamukaanneqarsimavoq, tassanilu qanoq pisoqarsimanersoq politiit paasiniaassallutik.
Angut ajunngilaq, ilaqutaasullu tamatumannga ilisimatinneqarsimasut oqaatigineqarpoq.
Issittumi Sakkutooqarfimmit angut Uummannap eqqaani ujaarineqartoq, Facebook aqqutigalugu ilisimatitsissutigineqarpoq. Najukkami umiatsiaatilimmut attartukkamik sumiiffimmi ujaasisoqarpoq aamma Issittumi Sakkutooqarfik Air Greenlandip qulimiguuliutaanik aallartitsisimavoq, taanna maannakkorpiaq Kangerlussuarmiit Uummannap eqqaanukarpoq, ullup-qeqqatalu missaani apuunnissaa naatsorsuutigineqarluni.
Angut Illorsuarniit pingasunngornermi ualikkut marlup missaani aallarsimavoq, Qaarsullu aqqusaarlugu Uummannamukartussaasimalluni.
Umiatsiaq ujaarineqartoq POCA 505-iuvoq tungujortumik qalipaatilik aamma aquuteralaata ilisarnaatitaa ilisimaneqanngitsoq 60HK-nik sukkassuseqarpoq.
Issittumi Sakkutooqarfimmit inuit sumiiffimmi najugaqartut qinnuigineqarput ujaaseqataaqqullugit, suliamullu atatillugu paasissutissaateqarsinnaasut Kalaallit Nunaanni Politiinut oqarasuaat 701448 aqqutigalugu saaffiginneqqullugit.