Angut utoqqaq coronamik tunillatsissimasoq toqusoq
Kalaallit Nunaanni Coronamik toqquteqartoq siulleq toqukkut qimaguppoq. Nunatta Nakorsaaneqarfia taama nalunaaruteqarpoq.
Angut utoqqaq Upernavimmiu, coronamik tunillatsissimasoq toqusimasoq, maanna nalunaarutigineqarpoq.
Tamanna nunatta nakorsaaneqarfiata tusagassiorfinnut nalunaaruteqarluni uppernarsarpaa.
- Angut utoqqaq Upernavimmeersoq, Upernaviup Peqqissaaviani uninngasoq Covid-19-imik toqquteqarpoq, ilisimatitsissutigineqarpoq.
- Toqusoqartarnera tamatigut alianartuusarpoq. Ajoraluartumik maani nunatsinni tuniluuttoqarnerani naatsorsuutigineqarluinnartutut nappaat inuunermik akeqartartussanngorpoq aammalu nunarsuarmi sumiiffinni allanisulli ineriartulerluni, nunatta nakorsaanera Henrik L. Hansen oqarpoq nangillunilu:
- Nunatsinniittut tamaasa akiuussutissamik kapiteqqullugit aammalu tuniluunneq pinaveersaarniarlugu maleruagassanik tunngaviusunik malinneqqullugit kaammattuinnarsinnaavakka. Tamanna napparsimaruluttut amerlassusissaannik killilersuiniarnermut amerlanerusullu toqunissaannik pinaveersaartitsinermut pitsaanerpaavoq.
Tuniluuttoqangaatsiartoq
Upernavimmi nunaqarfiinilu tuniluunneq qanoq annertutiginersoq paasiniarlugu misissuisoqangaatsiarpoq. Tamannalu sapaatip akunnerata naanerani sapaatip akunneratalu tulliani ingerlanneqaannassaaq.
- Maannamut paasisaagallartut takutippaat sumiiffimmi inuiaqatigiit akornanni annertungaatsiartumik tuniluuttoqartoq.
Upernavimmi nunaqarfiinilu ulluni kingullerni misissortittunit qassit tunillatsissimanersut suli nalunaarutigineqanngilaq.