Angut toqutsisimasutut ukiuni arfineq-marlunni pinerluuteqarsimasunut inissiisarfimmiittussanngorlugu pineqaatissinneqarpoq
Angut 20-kkut qiteqqullugit ukiulik Tasiilami angummik 42-nik ukiulimmik toqutsisimasutut ukiuni arfineq-marlunni pinerluuteqarsimasunut inissiisarfimmiittussanngorlugu pineqaatissinneqarsimavoq. Angutip pineqaatissiissut suliareqqitassanngortissimavaa.
42-nik ukiulik Odin Mikiki siorna oktoberip qaammataani, Tasiilami pisuinnaat aqqutaanni peqqarniitsumik annersarneqarsimavoq, silamilu qerinnarsilersumi qimaannarneqarsimalluni. Ikini kingusiinnerusukkut toqqutigai.
Maanna angut 20-kkut qiteqqullugit ukiulik Sermersuup Eqqartuussiviani, sapaatip akunnerani matumani ulluni pingasuni pisimasumik suliarinnissimasumi toqutsisimasutut pineqaatissinneqarpoq.
Angut pineqartoq pinerluuteqarsimasutut ukiuni arfineq-marlunni pinerluuteqarsimasunut inissiisarfimmiissaaq. Tamatuma saniatigut angut pineqartoq Tasiilap katersugaasiviani aserortereqataasimasutut aamma pineqaatissinneqarpoq, aserorterisimaneq 700.000 koruunit sinnerlugit naleqarpoq. Angutip pineqaatissinneqarninini Kalaallit Nunaata Eqqartuussivianut suliassanngorteqqissimavaa.
Angut alla 20-kkut aallartilaarlugit ukiulik, 42-nik ukiulimmik Odin Mikikimik ikiuisimanngitsutut pineqaatissinneqarpoq, Odin Mikiki persuttarneqareerluni inuunerminik ulorianartorsioraluartoq ikiorsimanngimmagu. Inuup inuuneranik ilaginnaaneq pillugu paragraffi naapertorlugu taanna pineqaatissinneqarpoq.
Immiaaqqanik karsinik marlunnik aamma tillitaqarsimasut
Angutip aappaa qaammatini arfinilinni pinngitsoorani pinerluuteqarsimasunut inissiisarfimmiittussanngorlugu pineqaatissinneqarpoq. Katersugaasivimmi aserortereqataasimasutut aamma unnerluunneqaraluarluni pinngitsuutinneqarpoq. Eqqartuussut akuerissanerlugu eqqarsarfeqarnissamik piumasaqarsimavoq.
Angutit pineqartut marluullutik unnuami Odin Mikikip persuttarneqarfiani, diskotekimi immiaaqqanik karsinik marlunnik tillissimasutut aamma pineqaatissinneqarput.
- Naammagisimaarparput angut 20-kkunik ukiulik asuli toqutsisimasutut annertuumillu aserorterisimasutut pisuutinneqarnissaanik eqqartuussiviup isumaqataanera. Peqatigitillugu pineqaatissiinerup erseqqissumik takutippaa, innuttaasumik inuunerminik erseqqilluinartumik ulorianartorsiortumik ikiortissarsiorani qimatsiinnartoqarsinnaanngitsoq, unnerluussisutut fuldmægtigi Nina Jessen unnerluussisutut ingerlatsisoq oqarpoq.