Angut toqutsisimanerminik timimullu iliuusissaanngitsumik iliuuseqarsimanerminik nassueruteqarpoq
Angutip illuusani Tasiilami erngutsillutik toqussimallugu pingasunngornermi ullaap tungaani nassuerutigaa. Angut eqqarsartaatsimigut napparsimasutut nalilerneqarpoq.
Angut illuusaminik Tasiilami siorna 25. april toqutsisimasutut pingasunngornermi sisamanngornermilu eqqartuunneqarpoq.
Eqqartuussinermi angutip illuusani toqussimallugu aamma kingorna timaa aggorsimallugu, ilaatigut niaquersimallugu oqaluttuaraa.
Inngilinit piumaffigineqarsimagami taamaaliorsimalluni angut nassuiaavoq, toqutsinissaalu sioqqullugu taamaaliorsimasut nassuiaavoq.
Unnerluutigineqartoq Danmarkimi eqqarsartaatsimigut misissorneqarsimasoq, unnerluussisussaatitaasoq Gutti Harryson eqqartuussinerup aallartinnerani ilisimatitsivoq, tassanilu eqqarsartaatsimigut napparsimasutut nalilerneqarsimavoq.
Toqutsineq sioqqullugu angutit taakku Tasiilami Pilersuisumi naapipput immiaararsillutillu, tamatuma kingorna unnerluutigineqartut najugaanut immiaarartoriarput.
Politiit oqarnerat naapertorlugu toqutsineq nal. 10.30 aamma 13.15 akornanni pivoq, tassani unnerluutigineqartup illuusani qimippaa, kingornalu savimmik pingasoriarlugu kapillugu toquppaa.
Aqaguani tigusarineqartoq
Suliap ingerlaneranik politiit saqqummiussinerat naapertorlugu unnerluutigineqartoq toqutsereernermini illoqarfiliarsimavoq. Unnerluutigineqartoq ilaatigut immiaarartorlunilu benziinamik qumuteralannit tigusaminit naamaarsimalluni oqaluttuarpoq.
Inuusuttut pingasut unnerluutigineqartup najugaani inummik toqungasumik, niaquanik timaanik peerneqarsimasumik, aatsaat apriilip 26-anni unnuakkut nal. 01.52 politiit nalunaarfigineqarput.
Politiit unnerluutigineqartoq pasivaat, toqusup timaa uffarfimmi nassaarineqarmat, unnerluutigineqartullu inaani aattaqarmat.
Angut unnerluutigineqartoq politiit illoqarfimmi issiaartarfimmi issiasoq nassaarimmassuk, nal. 05 ullaassakkut tigusarineqarpoq.
Unnerluutigineqartoq kingusinnerusukkut tunngaviusumik killisiorneqarneranut atatillugu tigummigallarneqartussanngortinneqarpoq, Danmarkimilu tarnimikkut napparsimasunut inissiisarfimmut katsorsarneqartussanngorlugu aallartinneqarpoq, unnerluutigineqartorlu ullumikkut eqqartuussisoqarnissaa tikillugu tassaniissimavoq.
Unnerluutigineqartoq Danmarkimi tarnimikkut napparsimasunut inissiisarfimmi piffissaligaanngitsumik katsorsarneqartussanngorlugu unnerluussisussaatitaasoq piumasaqarpoq.