Angut toqutseriarsimasutut pasillerneqarluni ulluni 27-ni tigummigallagaalersoq
Angut Sisimiuni toqutseriarsimasutut pasillerneqarluni 27. januar tungaanut tigummigallagassanngortinneqarpoq. Kalaallit Nunaata Politiivini pigaartut pisortaat Nûno Larsen taama ilisimatitsivoq.
Kalaallit Nunaata Politiivi ukiutoqqami ukiortaamilu ulapingaatsiarsimapput.
Angut Sisimiuneersoq angummut allamut toqutseriarsimasutut pasillerneqarluni tigummigallagassanngortinneqarpoq. Angut ima sakkortutigisumik persuttaasimavoq, iliornera toqutseriarnertut taaneqarsinnaalluni, Kalaallit Nunaata Politiivinit Nûno Larsen Sermitsiaq.AG-mut ilisimatitsivoq.
Nûno Larsen ilisimatitsivoq persuttaasoqarneranik nalunaarut 31. decemberip unnuaani pisimagitsik. Angut 27. januar 2022 tungaanut tigummigallagassanngortinneqarpoq, suliarlu politiinit paasiniarneqarluni.
Qaanaami ikuallaasoqartoq
Politiit 31. december 2021-miilli maannamut ulapingaatsiarput. Suliat amerlanerpaartaat imigassartorsimanermit aallaaveqartut ilisimatitsissutigineqarpoq. Nalunaarutinillu politiit suli tigusisaqattaartut, Nûno Larsen ilisimatitsivoq.
Suliat paasiniarneqartut annerit ilaat Qaanaami aamma pivoq.
- Suliami tigusarisaqarpugut pasisatsinnik. Qaanaami ikuallatsitsisoqarsimavoq. Ikuallatsitsinermi suna tunuliaqutaanersoq suli qulakkiinngilarput, Nûno Larsen oqarpoq erseqqissarlugulu suliaq suli paasiniarneqartoq.
Sermiligaami toqutsisoqarsimasinnaanera aamma paasiniarneqarpoq, suliamilu pasisaq tigusarineqarsimalluni.