Angut toqutseriarsimasutut eqqartuussaalertoq
Angut Qeqqata Kommuniani nunaqarfimmiittoq toqutseriarsimasutut, toqutsinissamik siorasaarisimasutut aammalu najugaqarfiup iluani aallaammik igissimasutut eqqartuunneqartussanngorpoq. Unnerluussisussaatitaasup piumasaraa ukiuni pingasuni pineqaatissinneqarluni inissiisarfimmiittussanngortinneqarnissaa.
Angut Qeqqata Kommuniani nunaqarfimmi pisimasunut assigiinngitsunut pingasunut pisuusutut unnerluunneqarluni eqqartuunneqartussanngorpoq.
Unnerluussut naapertorlugu angut toqutseriarsimavoq, toqutsinissamik siorasaarisimavoq aammalu sanaartorfigineqarsimasumi 500 miiterit iluanni aallaammik igissimavoq.
Pisut januarip 21-ani 2021 nalunaaqutaq 18.00 aamma nalunaaqutaq 19.50 iluanni pisimapput.
Siorasaarineq aallaammillu igeriarnerit
Unnerluutigineqartoq inummut savimmik marloriarluni kapiseriarsimavoq. Iluatsinngimmalli ”allaat inuup sakiaanut pisippaa eqillugulu aallaasip savequtai makkortillugit, aallaalli aallanngilaq, saniatigullu oqalulluni ”Toqussavakkit” assigisaanilluunniit", unnerluussummi allassimavoq.
Unnerluussut naapertorlugu angut kingorna nunaqarfimmi aallaaserluni pisussimavoq, inuillu arlallit ujarlugit. Ujaasinermini suaartarsimavoq: ”Nuigitsi tamassi toqunniassavassi”.
- Pineqartup najugaata tungaanut aallaammik igilluni, taamaalilluni inuit arlallit pineqartut inuunerinik, peqqinnerinik atugarissaarnerannilluunniit annertuumik siooralersitsilluni, unnerluussummi allanneqarsimavoq.
Ukiuni pingasuni pineqaatissiineq
Angut unnerluunneqartoq Qeqqata eqqartuussiviani 25. marts eqqartuunneqassaaq. Unnerluussisussaatitaasoq suliami pingasunik pineqaatissiinissamut piumasaqarpoq.
Unnerluussisussaatitaasup piumasarai:
- Ukiuni pingasuni inissiisarfimmiittussanngortitsineq.
- Aallaasit marluk savillu arsaarinnissutigineqarnissaat.
- Unnerluussisussaatitaasut taarsiivigineqarnissamik piumasaqaateqarsinnaanerat sillimaffigeqquneqarpoq.
