Angut toqutseriarsimasutut eqqartuunneqartoq
Angut 39-nik ukiulik Uummannameersoq toqutseriarsimasutut ukiuni pingasuni qaammatinilu arfinilinni pineqaatissinneqarsimasunut isertitsivimmiittussanngorlugu eqqartuunneqarpoq.
Angut Uummannameersoq toqutseriarsimasutut ukiuni pingasuni qaammatinilu arfinilinni pineqaatissinneqartussanngorpoq. Unnerluussisussaatitaasoq tusagassiorfinnut nalunaaruteqarluni ilisimatitsivoq. Taamaasilluni Qaasuitsup eqqartuussiviata unnerluussisussaatitaasup suliami piumasarisaa malippaa.
Savilersortoq
Pisoq Uummannami december 2020-mi pivoq.
- Erngunnerup nalaani angut 54-inik ukiulik aamma angut 39-nik ukiulik oqqatilerput. Oqqannerup kinguneranik angut 39-nik ukiullip angut 54-inik ukiulik savimmik ukusartuminik kapivaa qungasiatigut savilersorfigalugu, politiit tusagassiorfinnut nalunaarummi ilisimatitsipput.
Qaasuitsup eqqartuussiviata sapaatip akunnerani kingullermi pingasunngornermi suliaq suliaraa. Angullu pinerlussimasoq angummut 54-inik ukiulimmut toqutseriarsimasoq uppernarsarneqartutut nalilerlugu.
Pineqaatissiissut akuerineqarpoq
Eqqartuunneqartup aamma unnerluussisussaatitaasup eqqartuussut akueraat, suliarlu naammassivoq.
Suliami aalajangiineq unnerluussisussaatitaasup iluarisimaarpaa:
- Politiit paasiniaanerminni sulilluarsimanerat eqqartuussivimmi aalajangernerup inerneranut pitsaasumik sunniuteqarpoq. Politiillu unnerluussinerat unnerluussisussaatitaasup aamma pitsaasumik naammassivaa, unnerluussisussaatitaasoq Marutha Thayapharan oqarpoq.
Savilersorluni peqqarniitsumik pinerluttoqarsimasoq, saassunneqartorlu inuunerminik ulorianartorsiortinneqarsimasoq, unnerluussisussaatitaasoq naliliivoq.
Pineqaatissinneqartoq december 2020-mili tigummigallagaasimavoq. Pineqaatissiissummi ilanngullugu pinerluffigineqartumut 20.000 koruuninik taarsiisussanngorlugu akiligassinneqarportaaq.