Angut qamuteralalluni ajutoortoq toqukkut qimagussimavoq
Inuit marluk marlunngornermi qamuteralatsillutik sikukkut nakkarsimapput. Nakkarsimasut aappaa toqusoq, politiit ilisimatitsipput.
Angutit marluk Nuup eqqaani Kangerluarsunnguani qamuteralannik angalatillutik ajutooramik sikukkut imaanut nakkarsimapput.
Angutit marluk marlunngornermi ualikkut imaanit qaqinneqarput, angutilli aappaata inuunera annaanneqarsinnaasimanngilaq, Kalaallit Nunaanni Politiit pingasunngornerup ullaavani oqaluttuarput:
- Angutip 41-nik ukiullip Dronning Ingridip Napparsimmavissuani uummarsarneqaraluarnera iluatsinngitsoorneqarsimavoq, marlunngornermilu toqukkut qimagulluni, Kalaallit Nunaanni Politiit allattoqarfianni pisortaq Emil Maegaard-Hoffmanna Sermitsiaq.AG-mut oqaluttuarpoq.
41-nik ukiulik Nuummeersuuvoq. Qamuteralammik angalasimasup aappaa, angut 32-nik ukiulik ajunngitsoq oqaatigineqarpoq.
Ikinngutini attavigisinnaajunnaarsimagaa
Allattoqarfimmi pisortap ilisimatitsissutigaa, angutit taakku marluk Kangerluarsunnguup sikuatigoortillutik, aappaata ikinngutini attavigisinnaajunnaarsimagaa.
Politiinut kalerriisimavoq nammineerlunilu ikinngutini ujaarilersimallugu. Sikulu aserormat qamuteralaa imaanut nakkarmat imaanut nillertupilussuarmut nakkarsimalluni.
Oqartussat arlallit inuinnaallu annaassiniartoqarneranut suleqataasimapput. Nuummi Qatserisartut sikumi annaassiniaqataasimapput kiisalu qamuteralallit klubbianni ilaasortat nakkutiginneqataallutik oqartussanut nalunaaruteqartarsimallutik.
Issittumi Sakkutooqarfiup umiarsuaq Ejnar Mikkelsen aallartissimavaa, Air Greenlandillu qulimiguulik aallartissimallugu, qulimiguulik atorlugu angutit marluk imaanit qaqinneqarsimapput.
Sakkortuumik kaammattuisut
Emil Maegaard-Hoffmannip oqaatigaa, angutip aappaa siullermik Ejnar Mikkelsenimut qaqinneqapallassimasoq, annaanneqarami suli uumasoq takuneqarsinnaammat.
41-nilli ukiulik Nuummi napparsimmavissuarmut toqqaannartumik ingerlanneqarsimavoq, ajoraluartumilli annaanneqarsinnaasimanani.
Allattoqarfimmi pisortap tassunga atatillugu sakkortuumik kaammattuutigaa:
- Kangerluarsunnguup sikuani angalasoqannginnissaa sakkortunerpaamik kaammattuutiginiarpara, sikumi saattuaraangami angalaffigissallugu ulorianarpoq.
Suleqatigiilluarsimanermut qujasoq
- Oqartussat allat annaassiniarnermullu peqataasimasut qujaffigerusuppakka. Taamak pitsaatigisumik suleqatigiilluartoqarsimanngitsuuppat suli tamanna ajornerusumik kingunersimasinnaagaluarpoq, Emil Maegaard-Hoffmann oqarpoq.
Allattoqarfimmi pisortap tusagassiorfinnut nalunaaruteqarluni allakkamini kikkunnut tamanut kaammattuutigaa, angalanermi atortorissaarutinik ajunaalernermi kalerriutitut atorneqarsinnaasunik nassartaqqullugit, soorlu pisumi matumani tamanna aalajangiisuulluinnarsimasoq, annaassiniartummi atortorissaarutip sumiissusersiutaa atorlugu ajutoorfimmut sukkasuumik anngussinnaasimammata.
Angutip toqukkut qimaguttup ilaqutai ilisimatinneqarsimapput.