Angut panissaminik atornerluisimasoq sakkortunerusumik pineqaatissinneqassaaq

Angut 61-inik ukiulik Sisimiuneersoq panissaminik kinguaassiuutitigut atornerluisarsimanini pillugu ukiuni arfinilinni pineqaatissinneqarsimasunut inissiisarfimmiittussanngortinneqarpoq. Kinguaassiuutitigut atornerluinerit ukiuni 16-ini pisimapput.

Suliaq eqqartuussivimmi siusinnerusukkut suliarineqarsimavoq, angut suliami ukiuni tallimani pineqaatissinneqartussanngorlugu aalajangerneqarsimalluni. Angutilli suliaq Nunatta Eqqartuussivianut ingerlateqqippaa, iperagaanissani piumallugu. Ilanngullugu unnerluussisussaatitaasoq pineqaatissiissutip sukanganerunissaanik piumasaqarpoq. Suliaq Nunatta Eqqartuussiviani sapaatip akunnerata siuliani suliarineqarmat, unnerluussisussaatitaasoq ilalerneqarpoq, angullu ukiuni arfinilinni pineqaatissinneqartussanngorpoq.

Kalaallit Nunaata Politiivi tusagassiorfinnut taama nalunaaruteqarput.

Ukiuni 16-ini atornerluisarsimasoq

- Eqqartuussummi 4. majimi aalajangerneqarpoq angut panissaminik kinguaassiuutitigut pinngitsaaliisarsimanini atoqateqartarsimaninilu pillugit ukiuni arfinilinni pineqaatissinneqassasoq, politiit ilisimatitsipput.

Politiit ilisimatitsissutigaat pinngitsaaliinerit aallartimmata niviarsiaraq arfinilinnik ukioqarsimasoq.

- Niviarsiaraq kinguaassiuutitigut atornerlunneqartarnermi kingorna 15-inik ukioqarluni naartulerpoq. Kinguaassiuutitigut atornerluinerit Sisimiuni ilaqutariit angerlarsimaffigisaanni pisarsimapput, aatsaallu 2017-imi unillutik. Arnap pinerligaasup suliassaq politiinut 2019-imi tunniuppaa, ilisimatitsissutigineqarpoq.

Suliaq alianartoq

Nunatta Eqqartuussiviata ukiuni arlalinni annertuumik atornerluisimaneq tunngavigalugu pineqaatissiissut ukiunut arfinilinnut inissippaa.

- Meeqqat kinguaassiuutitigut atornerlunneqarsimatillugit suliaq imaannaanngitsuunanilu alianartuujuaannarpoq. Nunatsinnili politiit innuttaasullu pissutsinut taama ittunut eqeersimaarnerulernikuupput, unnerluussisussaatitaasoq Mads Schønning Frandsen oqarpoq nangillunilu:

- Suliami uani Nunatta Eqqartuussivia unnerluussisussaatitaasumut isumaqataavoq. Ukiunimi arlalinni meeqqamik atornerluineq imaannaanngilluinnarpoq sakkortuumillu pineqaatissiissutaasariaqarluni, oqarpoq.

Nunatsinni sakkortunerpaamik pineqaatissiissut tassaavoq ukiuni qulini pineqaatissinneqarneq.

Angut pineqartoq januarimi 2021-imi eqqartuussivimmi suliap suliarineqaqqaarnerani tigummigallagaavoq, sulilu tigummigallagaalluni.