Angut Nuummi pinngitsaaliisimasutut pineqaatissinneqartoq
Angut pinngitsaaliisimasutut kannguttaalliorfiginnissimasutullu qaammatini qulingiluani pinerluuteqarsimasunut inissiisarfimmiittussanngorlugu sisamanngormat eqqartuunneqarsimavoq.
Angut Nuummeersoq sisamanngormat Sermersuup Eqqartuussiviani unnerluunneqartut issiavianni issiavoq.
Angut alla peqatigalugu siorna arnamik pinngitsaaliisimasutut kannguttaalliorfiginnissimasutullu unnerluuutigineqarsimavoq.
Allagaq unnerluussut naapertorlugu, innarliineq Nuummi 2019-imi juunip 30-ani ullaakkut sisamat arfernullu akornanni pisimavoq.
Angutit taakku marluk pinngitsaaliisimatut unnerluutigineqarsimapput, arnaq aalakoornini pissutigalugu akiuussinnaanngitsoq atoqatigisimagamikku.
Iliuuserisartik telefonikkut immiussimagaat
Angutit taakku marluk pinngitsaaleereernerminni arnaq kannguttaalliofigisimavaat, iliuuserisamillu ilaat mobiltelefonimut immiussimallugit.
Angutip aappaannaa sisamanngormat eqqartuunneqarsimavoq, angut peqatigisimasaa Kalaallit Nunaanniinngimmat.
Taamatut ilisimatitsivoq Margrethe Najaaraq Kleist Kalaalit Nunaanni Politiineersoq. Taanna politiiuvoq suliamilu unnerluussisuulluni.
Unnerluussisussaatitaasut angut unnerluutigineqartoq qaammatini qulingiluani pinerluuteqarsimasunut inissiisarfimmut inissinneqarnissaa piumasarisimavaat, aamma arnamut 50.000 koruuninik taarsiisussanngorlugu akiligassinneqarnissaa piumasarisimavaat.
Eqqartuussummut akuersaarsimasoq
Najaaraq Margrethe Kleist ilisimatitsivoq, Eqqartuussivimmit angut pisimasuni marlunni pisuutinneqartoq, aamma politiit allakkami unnerluussutaasumi inassuteqaataat malillugu qaammatini qulingiluani pineqaatissinneqarsimasunut inissiisarfimmiittussanngorlugu kiisalu arnamut 50.000 koruuninik taarsiisussanngorlugu eqqartuunneqarsimasoq.
Eqqartuussissuserisoq Ulrik Blidorf maanna pineqaatissinneqartumut illersuisuusimavoq:
- Eqqartuussut akuersaarparput, sullitamalu pisimasut annersaat eqqortuunerarpai, Ulrik Blidorf suliaq pillugu Sermitsiaq.AG-mut oqarpoq.
Eqqartuussiviup angutip unnerluunneqarsimasup aappata qaqagu eqqartuunneqarneqarnissaa suli ullulersimanngilaa.