Angut nipilersorpalunnermit akornusersorneqartoq toqutsinermik suliami pingaarutilittut ilisimannittuusinnaavoq
Angummik kalaallimik 38-nik ukiulimmik Aalborgimi toqutsisoqarneranik suliami politiit ilisimannittumik ujaarinnipput. Angut taartumik amermik ilupaarusertalimmik kavaajalik Aalborgimi bibliotekip saavani arfininngornermi unippoq. Taanna pingaarutilimmik ilisimasaqarsinnaavoq.
Angut arfininngornermi unnukkut Aalborgimi bibliotekip saavani nipilersorpaluttoqarneranit akornusersorneqarunartoq, toqutsisoqarneranik suliami pingaaruteqarsinnaasunik takusaqarsimasinnaavoq.
Nordjyllandimi Politiit angummik taassuminnga oqaloqatiginnikkusuttut taama isumaqarput, taanna nalunaaqutaq 21.00 kinguninngua Rendsburggademi bibliotekip isaariaaniippoq.
Tamatuma missaani angut kalaaleq 38-nik ukiulik toqutaavoq. Ilisimannittoq taamaalilluni suliamut atatillugu pingaarutilimmik takusaqarsimasinnaavoq, politikommissær Carsten Straszek, misissuinermi aqutsisoq taama isumaqarpoq.
- Angutip taassuma inuit marluk bibliotekip isaariaata saavaniittut oqaloqatigai. Angut inuit nipilersukkanik nipituumik tusarnaarnerannit akornusersorneqartutut misigisimagunarpoq, taamaattumillu attaveqarfigai, taanna tusagassiuutinut nalunaarummi oqarpoq .
Ilisimannittunik amerlanerusunik ujartuisut
Angut toqutsisoqarneranik suliami pingaarutilittut ilisimannittuusinnaasoq, naatsunik nukaqarpoq qaamasumillu ameqarluni.
Taanna 35-55-it missaanni ukioqarpoq, qallunaatut oqaluttoq, amermik ilupaarusertalimmik taartumik kavaajalik, taartunik qarleqarlunilu kamippalik.
Innuttaasullu allat Aalborgimi bibliotekip nalaani arfininngornermi unnukkut pasinartumik takusaqarsimasut politiinut attaveqarnissamut kaammattorneqarput. Oqarasuaat 114-mut tamanna pissaaq.
Pisuunnginnerartut
Suliami inuit pingasut toqutsisimasutut unnerluutigineqartut tigummigallarneqarput. Angutit marluk arnarlu ataaseq 31-t aamma 41-t akornanni ukioqartut.
Angut 38-nik ukiulik arfininngornermi unnukkut bibliotekip silataani ilisimanngitsoq nassaarineqareersorlu taakku tigusarineqarput. Politiit angut nassaarimmassuk suli toqusimanngilaq. Kisianni annertuunik ajoqusersimavoq, kinguninngualu toqqutigai.
Angut Aalborgimi atornerluisut akornanni persuttaattoqarnerata kinguneranik toqutaasimassasoq, politiit isumaqarput.
Nordjyske naapertorlugit, taakku pingasut ataatsimoorlutik toqutsisimasut, politiit isumaqarput.
Taakku pingasut toqutsisimasutut unnerluussummi pisuunnginnerarput.