Skip to main content

Angut kalaaleq inuusuttoq rockerlutik nipilersortut peqatigalugit Europami tusarnaartitsisaartoq

Inuuteq Kleemann guitarerluni nipilersorluni tusarnaartitsisarnissaminut sinnattorisarsimasani piviusunngortillugu bandeqatinilu Forever Still Europami maanna tusarnaartitsisarluni angalavoq. Qasunarsinnaavoq, aammali nuannertupilussuuvoq, nipilersortartoq oqarpoq.

Inuuteq Kleemann meeraagallarmat takorloorneqarsinnaasimagunanngilaq inersimasunngoruni nujakkaajulluni, taartumillu taninneqarluni sakkortuunik nipilersortartut peqatigalugit tusarnaartitsisarluni angalasalissasoq.

Inuuteq Kleemann Uummannameersoq maanna 25-nik ukiulik, Europami nunani assigiinngitsuni qaammatip ataatsip missaani tusarnaartitsisarluni angalasareerpoq. Nipilersortartut Københavnimeersut, Forever Still, guitarertuuffigai, sapaatit akunneranullu arlaleriarlutik tusarnaartitsisarput. Nipilersortartut Cellar peqatigalugit tusarnaartitsisaqattaarput.

Charles Degolla

Frankrig, Italien, Tyskland aamma Polen ilaatigut tusarnaartitsiffigereerpaat, Finlandimilu tusarnaartitsisussanngorput.

- Assut sakkortusinnaavoq aamma qasunarsinnaalluni. Kisianni misigisanni nuannernerpaavoq, Inuuteq Kleemann, sisamanngornerup unnukkuani Finlandimut ingerlaartoq oqaluttuarpoq. Finlandimi marloriarlutik tusarnaartitsissapput.

Nuannaartorinnittoq guitarertartunngortoq

Inuuteq Kleemann nipilersornermik soqutigisaqartuaannarsimanngilaq. Meeraanermini nipilersuutit sallaannerit tusarnaartarsimavai, soqutigivissanagilli. Aqqanilinnilli ukioqarluni Siissisoq aamma Taaq tusartalersimavai, guitarernermillu soqutigisaqarnerulersimavoq. Ukiut tallimat qaangiummata Taaq-mi guitarertoq paarlallugu Uummannami tusarnaartitseqataaqqaarpoq.

- Taamani tusarnaartitsisarluni angalaneq sinnattorilerpara, takorloorsinnaasimanngilarali piviusunngorsinnaasutut. Sinnattuinnaasimavoq, sinnattoq angujuminaattoq, Inuuteq Kleemann oqarpoq.

Nipilersoqatigiit Forever Still januaarimi 2017-imi tusarnaaqqaarpai. Nipilersortariaasiat nuannarivaa, appittagaalu nuannarilluinnarlugit. Ukioq taanna naanngitsoq guitarertussarsiulermata misiliissalluni aalajangerpoq.

Forever Stillikkut nipilersugaat atorlugu guitarerluni imminut immiuppoq, nassiullugulu. Misilitsittussarpassuit allat assigalugit misilitseqataasussanut aggersarneqarpoq. Arlaleriarluni misilitsittareerluni ilisimatinneqarpoq soqutiginnikkuni nipilersortartuni peqataalersinnaasoq.

- Peqataarusunnersunga? Aallaqqaammut uppernaassuaarpoq, nuannerlunili. Nipilersortartuni peqataalerlunga ilisimatinneqarninnit sivisulaartumik upperiuminaatsinnikuuara, Inuuteq oqaluttuarpoq.

Sinnattoq piviusunngortoq

København qimallugu nunami allami tusarnaartitseqqaaqataalerami Tysklandimiippoq. Tusarnaartitsinissamut billitsit inniminnerneqarsinnaasut 35.000-it nungussimapput. Tusarnaartitsivissaq ulikkaavissimavoq.

- Soorlu sinnattoq piviusunngortoq. Scenemiinneq nuannarivara. Nipilersornerinnaanngilaq, aamma takutitsinerugami. Nipilersornerput takutitsinerpullu isiginnaartunit qisuariarfigineqaraangat, soorlu nukissamik nutaamik tunineqarluni, oqaluttuarpoq.

Inuuteq Kleemann nassuiaavoq nipilersortartutut Europami angalaneq oqittuinnaanngitsoq. Nipilersoqatigiit angalanissartik ineqarnissartillu namminneq akilerpaat, tusarnaartitsisaareernerullu kingorna Københavnimut uteruni sulilissamaarpoq. Sivikitsuinnarmilli, nipilersoqatigiimmi tusarnaartitsillutik angalaqqissamaarput.

- Nipilersornertut inuuneq aningaasannaffiorujussuanngilaq. Nuannarivarali, unitsinniarnagulu, Inuuteq Kleemann oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER