Angut kalaaleq Danmarkimit toqutsinermut pinngitsuutinneqartoq
Angut 19-nik ukiulik marlunngornermi kobenimik aamma savimmik angummik 35-nik ukiulimmik toqutsisimasutut pisuutinneqarpoq. Angut kalaaleq pinngitsuutinneqarpoq.
Decembarimi 2017-imi unnukkut angut 35-nik ukiulik inigisamini Randbølvejimi Vanløsemi savimmik arlaleriarluni kapineqarluni toquvoq.
Angut 19-inik ukiulik Frederiksbergimi eqqartuussivimmi 35-nik ukiulimmik toqutsisimasutut pisuutinneqarluni, ukiuni 12-ini paarnaarussassanngorlugu pineqaatissinneqarpoq.
Tamatuma saniatigut eqqartuussiviup angut kalaaleq 57-nik ukiulik, toqutsinermut ilaasimasutut unnerluutigineqartoq pisuunngitsutut eqqartuuppaa.
Taassuma aalajangiineq suliassanngorteqqinniarnagu aalajangerpoq, illersuisua Henrik Garlik eqqartuussivimmi ilisimatitsivoq.
Angutinut taakkununnga marlunnut allagaq unnerluussut naapertorlugu decembarip sisamaanni 2017-imi 35-nik ukiulik niaquatigut timaatigullu arlaleriarlugu tilluarsimavaat.
Tamatuma kingorna angutip 19-inik ukiullip allagaq unnerluussut pinerluffigineqartoq niaqutigut kobenip inngigissortaanik niaquatigut annersippaa, aappaatalu pinerluffigineqartoq niuatigut aalajangerlugu tigummigaa.
Tamatuma kingorna 19-inik ukiullip pinerluffigineqartoq arlaleriarluni uppataatigut saamerlikkut kapivaa, tunuatigullu marloriarlugu.
Toqusup timaanik misissuineq naapertorlugu 35-nik ukiulik tunumigut marloriarluni kapitinnerminik toqquteqarpoq. Pinerluffigineqartoq nakuuserfigineqarnerminut atatillugu 51-nik aqqunarneqarpoq.
Kisianni eqqartuusseqataasoqartillugu eqqartuussisut 57-nik ukiullip toqutsinermut peqataasimaneranut uppernarsaateqartoqannginnerarpaat, nakuusernermi imaluunniit pinerluffigineqartup aalajangersimaneqarneranik. Taanna suliami pinngitsuutinneqarpoq.
Angut kalaaleq suliap ingerlanerani pinngitsuuneraannavissimavoq. Sapaatip-akunnerata siuliani eqqartuussinermi siullermi nassuiarpaa, savimmik toqutsilluni kapisisoqarnerani inissiamiissimanani.
19-nik ukiullip eqqartuussut suliassanngorteqqinniarnagut aalajangerpoq.