Angut kalaaleq Danmarkimi savimmik kapineqarluni toqutaasoq
Angut 43-nik ukiulik sapaatip-akunnerata siuliani tallimanngornerup unnuaani savimmik kapineqarnermi kingorna toquvoq. Angutit marluk suliami tigummigallarneqarput.
Savimmik toqutsineq inissiami Randersimi pivoq, 43-nik ukiulik angutinik marlunnik 37-nik aamma 39-nik ukiulinnik tassaneeqateqarpoq.
Angut 43-nik ukiulik toqutaasoq kalaaliusoq taassumalu ilaqutai ilisimatinneqartut Østjyllandip Politiivi KNR-imut mailikkut allapput. KNR-ip ilanngutassiaa naapertorlugu politiit suliamut tunngatillugu annerusumik oqaaseqarusunngillat.
43-nik ukiullip saniatigut angutit allat marluk 37-nik 39-nillu ukiullit inissiamiipput, taakku tigusarineqarput inuartutullu pasineqarlutik.
- Inissiami susoqarsimanersoq kinalu savilersortuusimanersoq suli erseqqinngilaq. Maanna killisiueqqissaagut arlalinnillu misissueqqilluta pisumik nassuiaateqassalluta. Angut 43-nik ukiulik ilisarisimasani marluk peqatigalugit inissiamiissimasoq nalunngilarput, misissuinittalu aallartinnerani inunnik allanik inissiamiittoqarsimaneranut takussutissaqanngilaq, vicepolitiinspektør Lennart Glerup tallimanngormat suliaq pillugu oqarpoq.
Randersimi eqqartuussivimmi tallimanngornermi ullaap tungaani sassartitsinerup kingorna angutit taakku marluk Ritzau naapertorlugu angummik 43-nik ukiulimmik savimmik toqutsisimasutut parnaarunneqarput.
Parnaarunneqartup aappaata aalajangerneq Vestre Landsretimut suliassanngorteqqippaa, Østjyllandip Politiivi ilisimatitsipput.