Angut inersimasoq nakuuserluni pinerluttuusarpoq
Inuusuttut inersimasunit nakuuserfigineqarlutillu atornerlunneqartarput - politimesterip tamanna ernumanartoqartippaa.
Inuusuttut pinerluffigineqaraangamik, taava atornerluineq, nakuuserneq imaluunniit toqutsineq tassani pineqarajuttarpoq. Politiit ukiumoortumik kisitsisaataasa tamanna takutippaat.
Inuusuttunut 18-it inorlugit ukiulinnut kinguaassiutitigut kannguttaatsiliornerit pillugit politiit siorna suliat 200-t suliaraat.
- Inuusuttut taama amerlatigisut kinguaassiutitigut kannguttaatsuliorfigineqarlutillu nakuuserfigineqartarnerat, ernumanartorujussuusoq isumaqarpunga, politimester Bjørn Tegner Bay, Sermitsiaq.AG-mut taama oqarpoq.
Inuusuttut pinerluttarisa appariartornerannut sanilliukkaanni, taava qanoq pisoqartarnera ersarinnerulerpoq.
- Siullermik inuusuttut nakuuserlutillu kannguttaatsuliortuunngillat. Inersimasunuku inuusuttunik kinguaassiutitigut kannguttaatsuliorfiginnillutillu nakuuserfiginnittartut, politimesteri oqarpoq.
- Nakuusertoq imaluunniit kinguaassiutitigut kannguttaatsuliortoq angutaanerusarpoq inersimasoq.
Inuusuttunut kinguaassiutitigut kannguttaatsuliornernut tunngatillugu kisitsisit ukiuni kingullerni amerliartorput. Tamannali suliat amerlanerusut nalunaarutigineqartalernerannik pissuteqarsinnaavoq, ilorraallu tungaanut ingerlasoqarluni.
Uani sapaatip-akunnerani aviisip Sermitsiap nakuusertarneq annertuumik sammivaa. Aviisi uani pisiariuk: